Yerkir.am-ը ՀՀ պետական եկամուտների կոմիտեին ուղղված գրավոր հարցմամբ ճշտել է, թե որքա՞ն հարկ (խոսքը բոլոր տեսակի հարկերի մասին է) են վճարել 2018, 2019, 2020, 2021, 2022, 2023, 2024, 2025 թվականներին ՀՀ-ում գրանցված հետևյալ կրոնական կազմակերպությունները․
«Կյանքի Խոսք»,
«Ռեմա» քրիստոնեական կենտրոն,
«Նոր սերունդ» եկեղեցի,
«Եհովայի վկաներ»,
«Հիսուս Քրիստոսի Վերջին Օրերի Սրբերի Եկեղեցի»
Ստացված թվերից (տե՛ս կից աղյուսակը) կարելի է եզրակացնել, որ Փաշինյանի օրոք ծաղկել է այլ կրոնական կազմակերպությունների գործունեությունը։ Ըստ տարիների վճարած հարկերի համեմատությունից տեսանելի է, որ 2018 թվականից ի վեր, բացառությամբ որոշ տարիների, նշված գրեթե բոլոր կրոնական կազմակերպությունների գործունեությունն ակտիվացել է։ Իսկ որոշ կազմակերպությունների դեպքում այդ աճը հատկապես 2024, 2025 թվականներին դարձել է թռիչքային։
Այսպես, եթե «Կյանքի խոսք» կրոնական կազմակերպությունը 2018 թ․ վճարել է 27,580,227 դրամ հարկ, ապա 2025 թ․ գործունեության աճը ավելի քան կրկնապատկվել է, և կազմակերպությունը վճարել է 69,615,397 դրամ հարկ։ Թռիչքաձև աճ է գրանցել նաև ՀՀ-ում Եհովայի վկաների քրիստոնեական կրոնական կազմակերպության գործունեությունը․ եթե 2018 թ․ կազմակերպությունը վճարել է ավելի քան 3 մլն դրամ հարկ, ապա 2024 թ․ այն կազմել է ավելի քան 117 մլն, իսկ 2025 թ․՝ մոտ 56 մլն դրամ։ Աճի տեմպերով աչքի է ընկնում նաև մեկ այլ կազմակերպություն՝ «Հիսուս Քրիստոսի վերջին օրերի սրբերի եկեղեցու Հայաստանի կրոնական համայնքը»․ եթե 2018 թ․ կազմակերպությունը վճարել է ավելի քան 17 մլն դրամ հարկ, ապա 2024 թ․ այն կազմել է ավելի քան 65 մլն, իսկ 2025 թ․՝ ավելի քան 25 մլն դրամ։
Ընդհանրացված՝ փաստենք, որ փաշինյանական ութ տարիներին հիշյալ 5 կրոնական կազմակերպությունները միասին տվել են 741,6 մլն դրամ կամ ավելի քան 2 մլն ԱՄՆ դոլար հարկ: Աճման, որոշների դեպքերում՝ շեշտակի աճման տեմպերը վկայում են, որ այլ կրոնական կազմակերպությունները շեշտակի ընդլայնում են իրենց գործունեությունը։
Վերոնշյալ ցուցանիշների ֆոնին փաստենք, որ արդեն տևական ժամանակ է, ինչ հալածվում են Հայ Առաքելական եկեղեցու սպասավորները, երկրի բարձրագույն ղեկավարության կողմից ամենաստորացուցիչ քայլերն են ձեռնարկվում բազմաթիվ հեղինակավոր արքեպիսկոպոսների ու անձամբ Վեհափառ Հայրապետի նկատմամբ։
Իսկ պատմության այս օրը՝ 2026 թ․ օգոստոսի 7-ը, համարվում է մեծագույն ամոթի ու խայտառակության օր, երբ իրավաբանների կողմից ոչ միայն շինծու, այլև հակասահմանադրական համարվող մեղադրանքներով դատարան են կանչվել ու մեղադրյալի աթոռին են նստեցվել Լուսավորչի գահի 132-րդ գահակալ, Գարեգին Բ Ամենայն Հայոց կաթողիկոսն ու մի շարք բարձրաստիճան հոգևորականներ։
