«Ապօրինի գույքի բռնագանձման այս գործընթացը որ կա, ո՞րն է հիմնական խնդիրը, ինքն իսկապես դարձել է մահակ՝ ընդդիմադիրների դեմ օգտագործելու համար։ Երեկ նաև իմ գործընկերը՝ Մեսրոպ Մանուկյանը, այն հարցը բարձրացրեց, որ դատախազությունը թիվ է հրապարակել, թե 400-ից ավելի ուսումնասիրություններ կան արված, որոնց ուսումնասիրությունը դադարեցվել է․ այսինքն՝ այդքան մարդու նկատմամբ ինչ-որ ուսումնասիրություն են սկսել ու ինչ-որ մի պահից դադարեցրել։ Մենք ուզում էինք հասկանալ՝ ովքե՞ր են այդ անունները, դատախազությունը մեզ չի տրամադրում։
Սա ինչո՞ւ եմ ասում․ որովհետև սա հերթական գործիքն է դարձել քաղաքական հակառակորդների դեմ և նաև զուտ քարոզչական նպատակով օգտագործելու համար։ Պայմանական ինչ-որ մեկը, չգիտեմ, Գրիգոր Գրիգորյան․ «Այ, դու Նիկոլ Փաշինյանին ենթարկվո՞ւմ ես, մի հատ թթու խոսք չե՞ս ասում, մենք քո գույքի հետ կապված խնդիր չենք տեսնում։ Այ մյուսը որ խոսում է, մենք այստեղ կխորանանք, մի բան կփորձենք գտնել, չգտնենք էլ՝ մի բան կմտածենք»։ Խոսքը սրա մասին է։
Այդ գործերը մեր մասով գտնվում են դատարանում, դատերը դռնբաց են․ ես, ինչպես բազմիցս հայտարարել եմ, հիմա էլ եմ ասում՝ չկա որևէ ապօրինի բան»,- այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Լևոն Քոչարյանը։
Մանրամասն՝ տեսանյութում։
