Բելառուսի պետական սահմանային կոմիտեն հայտնել է, որ Լիտվայից ստացել է պաշտոնական ծանուցում ընդհանուր սահմանը հատելու սահմանափակումների վերաբերյալ:
«Արմենպրես»-ի հաղորդմամբ՝ ինչպես փոխանցում է ՌԻԱ Նովոստին՝ այս մասին հայտարարություն է տարածել Բելառուսի պետական սահմանային կոմիտեն։
Ըստ աղբյուրի՝ Լիտվայի ներքին գործերի նախարարության պետական սահմանապահ ծառայությունից ստացվել է պաշտոնական ծանուցում այն մասին, որ 2025 թվականի հոկտեմբերի 29-ին որոշում է ընդունվել պետական սահմանը հատելու սահմանափակման և կասեցման մասին։
Ընդունված փաստաթղթով սահմանափակումներ են մտցվում Մեդինինկայի անցակետով անձանց և տրանսպորտային միջոցների տեղաշարժի վրա մինչև ընթացիկ տարվա դեկտեմբերի 1-ը։ Սահմանափակումները չեն տարածվում դիվանագիտական կամ ծառայողական անձնագրեր ունեցող կամ լիտվական դիվանագիտական փոստ տեղափոխող անձանց, պարզեցված տարանցիկ փաստաթղթով ճամփորդող անձանց, հայրենիք վերադարձող Լիտվայի քաղաքացիների և նրանց ընտանիքի անդամների, ինչպես նաև Լիտվայում գործող բնակության թույլտվություն ունեցող և այնտեղ վերադարձող օտարերկրացիների վրա: Բացառությունը վերաբերում է նաև մարդասիրական վիզաներով Լիտվայի Հանրապետություն ժամանող օտարերկրացիներին, ԵՄ, ՆԱՏՕ-ի անդամ պետությունների և մի շարք այլ արտասահմանյան երկրների քաղաքացիներին։
Բելառուսի հետ սահմանին գտնվող երկրորդ անցակետում լիտվական կողմը լիովին կասեցրել է անհատների և տրանսպորտային միջոցների անցումը։
