«Մենք դեռ տեղյակ չենք ինչ են անում, գիտենք, որ խուզարկություններ են անում արդեն մոտ 3 ժամ։ Առավոտյան պլանային քննարկման էինք մասնակցում, որը ընդհատվեց, քանի որ քննչական մարմինները եկան, և այդ պահից սկսած՝ խուզարկությունները շարունակվում են երեք սենյակներում՝ տնօրենի սենյակում, փոխտնօրենի սենյակում բուժական գծով և ֆինանսական գծով փոխտնօրենի սենյակում»,- լրագրողների հետ զրույցում ասաց «Իզմիրլյան» ԲԿ հոգևոր տեսուչ Տեր Հովհաննես աբեղա Թորգոմյանը։
Հիշեցնենք, որ քննչական մարմինները ներխուժել են «Իզմիրլյան» ԲԿ ժամը 9-ից։
Լրագրողների հարցին,թ ե ինչ են փնտրում, հոգևոր տեսուչը պատասխանեց․ «Իմ կարծիքով, սա հակաեկեղեցական արշավի ևս մեկ դրսևորում էր։ Մենք սրան սպասում էինք և ասեմ՝ շատ են ուշացել, մենք ավելի շուտ էինք սպասում իրենց այստեղ»։
Հարցին, թե՝ որևէ կապ ունի՞ պարոն Չարչյանի՝ Վեհափառին աջակցող խոսքի հետ։ Հիշեցնենք, որ երեկ՝ փետրվարի 12-ին, «Իզմիրլյան» ԲԿ տնօրեն Արմեն Չարչյանը աջակցություն էր հայտնել Վեհափառին, իսկ ժամեր անց, իրավապահները ներխուժեցին ԲԿ։
«Կարող է և կապ ունի, չեմ կարող ասել»,- պատասխանեց տեր Թորգոմը։
Ինչ վերաբերում է հարկեր թաքցնելու մեղադրանքին, պատասխանեց․ «Լկտի սուտ։ Մենք կապ չունենք նման բանի հետ։ Իրենք արդեն ձևակերպումը պատրաստ եկել էին, ուղղակի պետք էր, որ գային գործողությունները, սկսեին՝ նոր հրապարակեին այդ ձևակերպումը։ Իրենք ամեն քայլի ընդունակ են և սրբազանի ասածի համաձայն՝ եթե իրենք ամեն ինչի ընդունակ են, մենք էլ պատրաստ ենք, բացարձակ մտավախություն չունենք, որովհետև մեր գործը արդար է»:
Ինչ վերաբերում է Արմեն Չարչյանին, ով արդեն մի անգամ կալանավորվել է այս իշխանությունների բռնաճնշումների արդյունքում, հոգևոր տեսուչն ասաց․ «Կարծում եմ՝ պարոն Չարչյանը այստեղ ոչ մի կապ չունի, էստեղ կապ ունի հաստատությունը որը, եկեղեցապատկան կառույց է: Պարոն Չարչյանը կլիներ, թե չգիտեմ՝ Պողոսյան կամ Պետրոսյան կլիներ, սա էական չէ: Էականն այն է, որ սա եկեղեցապատկական կառույց է և իրենց հերթական, հակաեկեղեցական արշավներից հերթական դրսևորումներից մեկն է»:
Մանրամասները՝ տեսանյութում։
