Ժնևում ՄԱԿ-ի գրասենյակին կից Իրանի Իսլամական Հանրապետության մշտական ներկայացուցչությունը միջազգային հանրությանը և ՄԱԿ-ի Մարդու իրավունքների խորհրդին (ՄԻԽ) կոչ է արել իրավական գնահատական տալ ԱՄՆ-ի և Իսրայելի գործողություններին, որոնք, ըստ իրանական կողմի, հարվածներ են հասցնում Իրանի քաղաքացիական ենթակառուցվածքներին։

ՄԱԿ-ի Մարդու իրավունքների խորհրդի 63-րդ նստաշրջանի մեկնարկին հրապարակված պաշտոնական հայտարարության մեջ իրանական դիվանագիտական առաքելությունն ընդգծել է, որ Խորհրդի մանդատը ուղղակիորեն պարտավորեցնում է հետաքննել միջազգային մակարդակով ճանաչված մարդու իրավունքների և հումանիտար իրավունքի կոպիտ խախտումները։

Իրանի ներկայացուցիչները հատկապես նշել են ԱՄՆ-ի ավիացիայի կողմից Մինաբ և Լամերդ բնակավայրերին, իրենց բնորոշմամբ, կանխամտածված հարվածների դեպքերը, որոնց հետևանքով զոհվել են խաղաղ բնակիչներ։

Թեհրանում այդ գործողությունները որակում են որպես պատերազմական հանցագործություններ և հայտարարել են, որ Իրանը մտադիր է միջազգային բոլոր հարթակներում պահանջել դրանց հետաքննություն և մեղավորներին պատասխանատվության ենթարկել։