Մենք մեծ աշխատանք ունենք կատարելու, վերականգնելու այն վնասը, որը Փաշինյանը հասցրել է երկրի տնտեսությանն ու անվտանգությանը։ Այս մասին այսօր՝ մարտի 18-ին, ներկայացնելով «Ուժեղ Հայաստանի» անվտանգային ծրագիրն՝ ասաց կուսակցության խորհրդի անդամ Նարեկ Կարապետյանը:
«Անցած 3 ամիսների ընթացքում մենք անդադար աշխատել ենք պատրաստելու և մեր ժողովրդին ներկայացնելու մեր տնտեսական և անվտանգային ծրագիրը։ Տնտեսական ծրագրում տեղ գտած յուրաքանչյուր հանձնառություն երաշխավորվում է Սամվել Կարապետյանի կողմից, դրանք նախընտրական խոստումներ չեն, մեր ժողովուրդը չի սիրում «խոստում» բառը, որը «չկատարման» հոմանիշն է, դրանք հստակ տնտեսական քայլեր են, որոնք կկիրառվեն հենց այն առաջին օրվանից՝ Սամվել Կարապետյանի վարչապետ դառնալուց հետո։ Սա կօգնի բարձրացնել մեր երկրի յուրաքանչյուր քաղաքացու կենսամակարդակը», -ասաց նա՝ ընդգծելով, որ սկսել են տնտեսական ծրագիրը, որովհետև հենց հզոր տնտեսություն է այն ամուր հիմքը, որի վրա կարելի է կառուցել ուժեղ և երկարատև խաղաղություն։
Նա ընդգծեց, որ ավելի հզոր տնտեսությունը նշանակում է ավելի մեծ միջոցներ, որոնք կարող են ուղղվել պաշտպանության ամենաժամանակակից կարողություններին և սպառազինության զարգացմանը, ուղղվել բանակին։ «Սամվել Կարապետյանի վարչապետությամբ Հայաստանը կընդլայնի իր ռազմավարական տնտեսական կապերը, իսկ նրա միջազգային կապերը նոր ներդրումներ կբերեն Հայաստան աշխարհի տարբեր ծայրերից։
Այսօր և՛ Արևելքը, և՛ Արևմուտքը շահագրգռված են Չինաստանից Եվրոպա տանող անվտանգ ճանապարհով, և պատմականորեն այդ ճանապարհը անցել է Հայաստանի միջով, այսօր էլ է անցնում։ Սա մի հնարավորություն է, որից կարող է օգտվել միայն Սամվել Կարապետյանի նման ուժեղ առաջնորդը։ Թույլ Փաշինյանի պայմաններում Հայաստանը պարզապես կհամաձայնի այնպիսի տնտեսական հարաբերությունների, որոնցում հիմնականում շահելու է մյուս կողմը, ինչպես օրինակ Ադրբեջանից բենզինի ներմուծման դեպքում»,- նշեց նա։
Մանրամասն՝ տեսանյութում։
