«Բանակումի կազմակերպումը հատկանշական է նրանով, որ ի հակառակ նրա, որ միջազգային հանրությունը, մեր թշնամիները և ՀՀ իշխանությունները ցանկանում են փակել Արցախի էջը, «Պիտի վերադառնանք» կարգախոսը կրող այս բանակումով ՀՅԴ-ն և ՀՅԴ-ական երիտասարդությունը մեկ անգամ ևս վերահաստատում են՝ Արցախի ազատագրական պայքարից չեն հրաժարվելու»,- այսօր Նեմեսիսի արձանի մոտ, ՀՅԴ երիտասարդական 12-րդ Համահայկական բանակումի մեկնարկին հայտարարեց ՀՅԴ Բյուրոյի անդամ Հովսեփ Տեր-Գևորգյանը։

Հովսեփ Տեր-Գևորգյանի փոխանցմամբ, չնայած այժմ հայությունը պառակտված է և աշխատանք է տարվում Հայաստան-Սփյուռք կապը խզելու, համահայկական այս բանակումով ՀՅԴ-ական երիտասարդները հայերի միասնականության օրինակ են ցույց տալիս, նաև՝ Սփյուռքից Հայաստան կապի ամրապնդման․ «Ի հակառակ նրա, որ հայ ժողովրդի մի ստվար հատվածը հոգեպես ընկճված և հուսալքված է, այս բանակումը միավորում է ՀՅԴ մարտունակ երիտասարդությունը։ Նայեք նրանց աչքերին, կտեսնեք համարձակություն, բոցավառվող պայքարի ոգի և հաղթանակի կամք։

Ի հակառակ նրա, որ մեր թշնամիների և նրանց կամակատար իշխանությունների կողմից Դաշնակցական երիտասարդությունը թիրախավորված է, հարյուրավոր երիտասարդներ Սփյուռքից եկել են հայրենիք՝ իրենց ընկերներին զորավիգ կանգնելու։

Ի հակառակ նրա, որ ՀՅԴ երիտասարդական կառույցը փորձ է արվում ներկայացնել իբրև ահաբեկչական, մեր գործունեությունը ցույց է տալիս, որ ՀՅԴ-ն ձգտում է իր տեսլականներն իրականացնել նորարարական, առաջադիմական ծրագրերով, միաժամանակ կառչած մնալով գաղափարական հենասյուներից, մասնավորաբար, ազգային ու գաղափարական նկարագրից»։

Մանրամասն՝ տեսանյութում։