AntiCor հակակոռուպցիոն հարթակը մեկ ամիս տևողությամբ հետազոտություններ է իրականացրել և փորձագետները համակարգային կոռուպցիայի լուրջ խնդիրներ են արձանագրել։ Այս մասին «Կոռուպցիան նախընտրական փուլում» աշխատաժողովի ընթացքում ասաց փաստաբան Արսեն Բաբայանը։

«Քրեական վարույթների շրջանակներում, հատկապես ընդդիմադիր կուսակցությունների նկատմամբ, նկատվում են դե ֆակտո տոտալ գաղտնալսումներ։ Մենք արդեն գիտենք, որ բոլորին այսպես գաղտնալսում են՝ հիշելով, օրինակ, Բագրատ Սրբազանի հետ կապված քրեական վարույթը, Խաչիկ Գալստյանի՝ «Հայրենիք» կուսակցության գլխավոր քարտուղարի հետ կապված ձայնագրությունը և բազմաթիվ այլ ձայնագրություններ։

Մենք տեսել ենք մի իրողություն, որ իշխանությունը, կամ ավելի ճիշտ՝ այս դեպքում իրավապահ մարմինները, այդ ձայնագրությունները ձևախեղում են, խմբագրում, փոփոխում, մոնտաժում և հրատապ ներկայացնում հանրությանը՝ որպես ապացույց այն բանի, թե իբր կոնկրետ թիրախավորված քաղաքական ուժը կամ անձը կատարել է, օրինակ, ընտրակաշառքի բաժանում, հավաքներին մասնակցելու համար նյութապես շահագրգռել մարդկանց և այլն։

Եվ որ ամենակարևորն է, որի մասին մենք վերջերս շատ ենք խոսում, հատկապես հինգ իրավապաշտպանների նախաձեռնության շրջանակներում, Վարազդատ Հարությունյանն առաջինը բարձրացրեց այս հարցը, որ Հակակոռուպցիոն կոմիտեն, օրինակ, յուրաքանչյուր ձայնագրություն կամ մամուլի հաղորդագրություն հրապարակելիս հետևողականորեն նշում է կուսակցության անունը․ օրինակ՝ ցույց են տալիս «Ուժեղ Հայաստան» կուսակցության դրոշները։

Ես գտնում եմ, կամ մենք գտնում ենք, որ Հակակոռուպցիոն կոմիտեի խնդիրը ոչ թե կոնկրետ քաղաքական ուժին թիրախավորելը պետք է լինի, այլ ընդհանրապես ընտրակաշառքների դեմ պայքարը։ Հակակոռուպցիոն կոմիտեի համար նշանակություն չպետք է ունենա՝ դա արել է «Ուժեղ Հայաստանը», «Հայաստան» դաշինքը, «Քաղաքացիական պայմանագիրը» և այլն։

Այսինքն՝ որպես կանխարգելում, ինչը հաճախ վերջին շրջանում ներկայացվում է իբր որպես այդ անունները տալու հիմնավորում, պետք է նշանակություն չունենա կոնկրետ անունը։ Պետք է լինեն ընդհանուր ձևակերպումներ՝ առանց կոնկրետ ուժի անուն նշելու»,- ասաց նա։

Մանրամասն՝ տեսանյութում։