«Ես չեմ ուզում, որ մենք թերագնահատենք ԵԽԽՎ զեկույցում տեղ գտած այն մասերը, մասնավորապես՝ «Բարգավաճ Հայաստան»-ի առանձնահատուկ դեպքը, երբ փաստացի մեկ քաղաքական ուժ դուրս է թողնվել խորհրդարանից։ Սա աննախադեպ իրադարձություն է, և պետք է չթերագնահատել այն հանգամանքը, որ այս իրավիճակը ևս նկարագրված է ԵԽԽՎ զեկույցում՝ նաև այլ հանգամանքների հետ մեկտեղ։ Սա պետք է արձանագրել։

Այո՛, այս իշխանությունները վերարտադրվել են՝ չստանալով 50+1 տոկոսը, և սա կարևոր շեշտադրում է, որը ես պետք է անեմ։ Սա նշանակում է, որ ժողովրդի մեծամասնությունը ձայն չի տվել այս իշխանությանը, և բացառապես օրենքի ուժով պայմանավորված՝ նրանք ստացել են, կարողացել են ձևավորել քաղաքական մեծամասնություն։

Բայց, բնականաբար, ինչպես և ամենասկզբում, երբ հայտարարել ենք, որ վերցնում ենք մանդատները և գնում ենք խորհրդարան, հայտարարել ենք նաև, որ շարունակելու ենք քաղաքական պայքարը։ Մեր գերխնդիրը, բնականաբար, ինչպես ամբողջ ընդդիմադիր դաշտի համար, շարունակում է լինել այս իշխանությունների հեռացումը։ Դա անելու ենք՝ օգտագործելով ինչպես խորհրդարանական լծակներն ու գործիքակազմը, այնպես էլ փողոցային պայքարի տրամաբանությունը, որովհետև առանձին-առանձին դժվար է հասնել արդյունքի, և միայն համատեղ ջանքերով, ընդ որում՝ ամբողջ ընդդիմադիր դաշտի կոնսոլիդացիայով, է հնարավոր հասնել այս իշխանությունների հեռացմանը։

Այսինքն՝ եթե ձեր հիմնական հարցադրումն այն էր, թե ինչ ենք անելու, բնականաբար, պայքարը շարունակելու ենք՝ օգտագործելով և՛ խորհրդարանական գործիքակազմը, և՛, ըստ իրավիճակի, համախմբված ընդդիմությամբ փորձելով հասնել այն նպատակին, որը պատկերացրել ենք»,- այս մասին հրավիրված ասուլիսում ասաց «Հայաստան» խմբակցության պատգամավոր Աննա Գրիգորյանը։

Մանրամասն՝ տեսանյութում։