Հայաստանի Ազգային ժողովի պատգամավորները երդում կտան նոր խմբագրմամբ։ Համապատասխան փոփոխությունները հաստատվել են Հայաստանի Ազգային ժողովի հուլիսի 3-ի արտահերթ նիստում։
Երդման տեքստն այժմ կհնչի հետևյալ կերպ․
«Հանուն Հայաստանի Հանրապետության հարատևության, անկախության, ինքնիշխանության և հզորացման՝ երդվում եմ բարեխղճորեն կատարել ժողովրդի ներկայացուցչի պարտականությունները, պահպանել Հայաստանի Հանրապետության Սահմանադրությունը և օրենքները, նպաստել ՀՀ պետականության ամրապնդմանը և շահերի պաշտպանությանը, անել ամեն ինչ քաղաքացիական համերաշխության, Հայաստանի Հանրապետության քաղաքացիների անվտանգության ու բարեկեցության, մարդու իրավունքների և ազատությունների պաշտպանության համար: Փա՛ռք նահատակներին և կեցցե՛ Հայաստանի Հանրապետությունը»:
Իսկ պատգամավորի երդման նախկին տեքստը հետևյալն է․
«Հանուն համազգային նպատակների իրականացման և Հայրենիքի հզորացման՝ երդվում եմ բարեխղճորեն կատարել ժողովրդի առջև ունեցած պարտականություններս, պահպանել Հայաստանի Հանրապետության Սահմանադրությունը և օրենքները, նպաստել Հայաստանի Հանրապետության ինքնիշխանության, իրավունքների և շահերի պաշտպանությանը, անել ամեն ինչ քաղաքացիական համերաշխության, ազգային ու համամարդկային արժեքների պահպանման համար»։
Նշենք, որ Խորհրդարանական ընդդիմությունը քվեարկությանը չի մասնակցել։
Օրենսդրական նախաձեռնության հեղինակներն էին իշխող «Քաղաքացիական պայմանագիր» կուսակցության պատգամավորները։ Նրանց կարծիքով՝ երդման նոր տեքստն ավելի համահունչ է այսօրվա իրողություններին, պետականությանը և Հայաստանի Հանրապետության գործող օրենսդրությանը։
