Իրանի արտաքին գործերի նախարար Աբբաս Արաղչին ճապոնացի գործընկերոջ՝ Տոշիմիցու Մոտեգիի հետ հեռախոսազրույցի ժամանակ հայտնել է, որ Միացյալ Նահանգները պետք է քայլեր ձեռնարկի Թեհրանի վստահությունը վերականգնելու համար, եթե ցանկանում են վերսկսել դիվանագիտությունն Իրանի միջուկային ծրագրի շուրջ։ «Արմենպրես»-ի փոխանցմամբ՝ այս մասին հայտնում է Tasnim գործակալությունը։
Կողմերը քննարկել են Իրանի միջուկային հարցի հետ կապված վերջին զարգացումները, ինչպես նաև Միացյալ Նահանգների և 2015 թվականի միջուկային համաձայնագրի մաս կազմող երեք եվրոպական երկրների դիրքորոշումները։
«Միացյալ Նահանգներն է, որ պետք է վերականգնի Իրանի վստահությունը դիվանագիտության նկատմամբ», – ասել է Արաղչին։
Նա շնորհավորել է Մոտեգիին պաշտոնում վերանշանակման կապակցությամբ և հույս հայտնել, որ Մոտեգիի նախորդ ժամկետի ընթացքում եղած կառուցողական երկկողմ կապերը կշարունակվեն։
Ճապոնացի նախարարը վերահաստատել է Տոկիոյի հանձնառությունը՝ կառուցողական դեր խաղալու Արևմտյան Ասիայում խաղաղության և կայունության խթանման գործում։
Նա ողջունել է տարածաշրջանային և միջազգային խնդիրները լուծելու քաղաքական նախաձեռնությունները և ընդգծել Ճապոնիայի աջակցությունը քաղաքական լուծումներին։
Հանդիպման ժամանակ երկու նախարարները քննարկել են երկկողմ համագործակցության, հյուպատոսական հարցերի և մարդասիրական հարցերի վերաբերյալ հարցեր՝ ընդգծելով Իրանի և Ճապոնիայի միջև ավանդական բարեկամական հարաբերություններն ամրապնդելու համար կանոնավոր խորհրդակցությունների շարունակականության անհրաժեշտությունը։
