«Այսօր հրավիրել ենք ձեզ, որպեսզի ներկայացնենք մեզ հասանելի դարձած ադրբեջանական մի փաստաթղթի վերաբերյալ տվյալներ։ Կներկայացնենք նաև հենց այդ փաստաթուղթը և կխոսենք դրա բովանդակության մասին։

Խոսքը վերաբերում է այսպես կոչված «Արևմտյան Ադրբեջանի համայնքի վերադարձի» կոնցեպտին։ Ի՞նչ է այն ներառում։ Ադրբեջանցիները մշակել են ծրագիր և կոնցեպտ, թե ինչպես են վերադառնալու և ինչ իրավունքներ են ունենալու այդ մարդիկ։

Այս ուղղությամբ հիմնական ակտիվացումը սկսվել է 2023 թվականին։ Ադրբեջանի նախագահի աշխատակազմի ղեկավարը նշանակվել է այս գործընթացի համակարգող, և գրեթե ամեն տարի անցկացվում են միջոցառումներ՝ «վերադարձի» թեմայով։ Սակայն վերջին չորս ամիսներն ամենաակտիվ շրջանն են եղել, որովհետև մի շարք հայտարարություններ են հնչել ամենաբարձր մակարդակով։

Ամեն ինչ սկսվեց Ադրբեջանի նախագահի՝ գիտնականների և Գիտությունների ակադեմիայի ներկայացուցիչների հետ հանդիպման ժամանակ արված հայտարարությունից՝ «Արևմտյան Ադրբեջան» վերադարձի վերաբերյալ, երբ նա նշեց, որ խաղաղությունից հետո պետք է վերադառնան այնտեղ։

Դրանից հետո սկսվեցին կրոնական առաջնորդների հայտարարությունները, մասնավորապես՝ Փաշազադեի տեղակալի խոսքը մզկիթների վերականգնման վերաբերյալ։ Այնուհետև արդեն զանգվածային միջոցառումներ սկսվեցին։ Անգամ անցած տարի Բրյուսելում «վերադարձի» թեմայով համաժողով էր կազմակերպվել, որտեղ եվրոպական հանրությանը ներկայացվում էր, թե ինչու են, իրենց կարծիքով, անհրաժեշտ այդ գործընթացները»,- այս մասին այսօր՝ մայիսի 30-ին, մամուլի ասուլիսի ընթացքում հայտարարեց «Ուժեղ Հայաստան» կուսակցության խորհրդի անդամ Նարեկ Կարապետյան։

Մանրամասն՝ տեսանյութում։