Սեպտեմբերի 11-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսն ընդունեց «Ֆրանսիական լույս» ասոցիացիայի նախագահ դոկտոր Լևոն Խաչատրյանի գլխավորած պատվիրակությանը, որի կազմում ընդգրկված էին հայազգի և ֆրանսիացի բժիշկներ։
Հանդիպմանը դոկտոր Խաչատրյանը Վեհափառ Հայրապետին ներկայացրեց ասոցիացիայի՝ Հայաստանում ծավալած առողջապահական ու մարդասիրական գործունեությունը՝ անդրադառնալով մասնավորապես Տավուշի մարզի սահմանամերձ համայնքներում առողջապահական ծառայությունների հասանելիության, բուժաշխատողների վերապատրաստման ծրագրերին։
Ողջունելով պատվիրակության անդամներին՝ Ամենայն Հայոց Կաթողիկոսը բարձրորեն գնահատեց բժիշկների ազնիվ հանձնառությունը, որի շնորհիվ տարիներ շարունակ հետևողական աջակցություն է ցուցաբերվում Հայաստանի բուժհաստատություններին և սահմանամերձ բնակավայրերում առողջապահական խնդիրներ ունեցող, սոցիալապես անապահով հայորդիներին։ Հայոց Հայրապետը կարևոր նկատեց նաև հայաստանյան գործընկերների հետ մասնագիտական գիտելիքների և փորձի փոխանակումը, ինչը կնպաստի Հայաստանի առողջապահական ոլորտի զարգացմանը և բնակչությանը մատուցվող բուժօգնության որակի բարձրացմանը։
Վեհափառ Հայրապետն իր երախտագիտությունը փոխանցեց պատվիրակության անդամներին, Ֆրանսիայի բարեկամ ժողովրդին և այն բոլոր կազմակերպություններին ու անձանց, որոնց զորակցությամբ կյանքի են կոչվում ասոցիացիայի մարդասիրական ծրագրերը՝ միաժամանակ ամրապնդելով հայ և ֆրանսիացի ժողովուրդների դարավոր բարեկամությունը։
Վերջում Ամենայն Հայոց Կաթողիկոսն իր օրհնությունը բերեց «Ֆրանսիական լույս» ասոցիացիային և ներկա բժիշկներին՝ մաղթելով արդյունավոր առաքելություն և նորանոր հաջողություններ իրենց մարդասիրական ու բժշկական օգտաշատ ծառայության մեջ
