Մոտ ութ գիտնականներ, որոնք կապված են եղել տիեզերական հետազոտությունների եւ միջուկային ֆիզիկայի հետ, ԱՄՆ-ում 2023 թվականից անհետ կորել կամ մահացել են չպարզված հանգամանքներում։ Այս մասին տեղեկացրել է Fox News-ը։

Հեռուստաալիքի տվյալներով՝ նրանց թվում է NASA-ի աշխատակից Մայքլ Հիքսը, որը մահացել է 2023թ․ 59 տարեկան հասակում: Նա զբաղվել է գիսաստղերի եւ աստերոիդների ուսումնասիրությամբ, սակայն մահվան պատճառը չի բացահայտվել։

2025թ․ անհետ կորած է ճանաչվել նաեւ 53-ամյա Մելիսա Կասիասը Լոս Ալամոսի ազգային լաբորատորիայից, որն աշխատում էր միջուկային տեխնոլոգիաների ոլորտում։

Ցանկում վերջինը ԱՄՆ ռազմաօդային ուժերի նախկին գեներալ-մայոր Ուիլյամ Մակքասլանդն է, որն անհետացել է 2026թ․ փետրվարին: Հեռուստաալիքի տվյալներով՝ նա գաղտնի տեղեկատվության հասանելիություն է ունեցել։

Fox News-ը նաեւ հաղորդել է, որ Սպիտակ տունը քննարկում է այս տեղեկատվության հետաքննության հնարավորությունը։