Միգրացիայի հետ կապված առաջին հերթին պետք է անես այնպես, որ քո սեփական երկրում դու հեռանկար տեսնես քեզ համար, քո սեփական երկիրը պետք է հետաքրքիր լինի և քո սեփական երկրում դինամիկա, շարժ պետք է երևա, որը հրապուրում է երիտասարդներին: Այս մասին այսօր՝ մարտի 21-ին, Աշտարակում քաղաքացիների հետ հանդպիման ընթացքում ասաց ՀՀ երկրորդ նախագահ Ռոբերտ Քոչարյանը՝ պատասխանելով այն հարցին, թե ինչպես կարելի է կանխել արտագաղթը և երկիրը գրավիչ դարձնել երիտասարդների համար։
«Ամենամեծ միգրացիան Հայաստանում եղել է 92-93 թվականներին և կապված էր էներգետիկ ճգնաժամի հետ։ Ուղղակի սարսափելի ժամանակներ էին։ Վերջերս նաև ես նշեցի, թե որտեղից եկավ այդ էներգետիկ ճգնաժամը։ Մեկ սխալ որոշում՝ ատոմակայանի փակելը արհավիրք էր Հայաստանի համար։ Բերեց էներգետիկ ճգնաժամի, որի պատճառով հարյուր հազարավոր մարդիկ ուղղակի լքեցին Հայաստան։
Դժվար էր ապրել։ Իսկապես, չեմ էլ կարող մեղադրել այդ մարդկանց։ Իշխանությունը հենց այն մարմինն է, կառավարությունը այն մարմինն է, որը պետք է այն պայմանները ստեղծի, որը երկիրը պետք է գրավիչ դարձնի երիտասարդների համար։ Սա հարցի մեկ մասն է։
Մյուս մասը․ եթե մենք դպրոցական ծրագրերից ջնջենք ամեն ինչը, որը կապված է ինքնության հետ, ապա երիտասարդի համար ի՞նչ տարբերություն որտեղ ապրել, եթե ինքը հայկական ինքնություն ուղղակի իր մեջ չունի։ Ուրեմն պետք է դաստիարակենք այնպես, որ հայկական ինքնությունը ոչ միայն հուլիսին ծիրան ուտելն է։ Կա այլ ինչ-որ արժեքային համակարգ, որը եթե քո մեջ ներդրված է մանկությունից, քեզ վրա ազդելու է այնպես, որ դու մեծ մոտիվացիա ունենաս ապրել Հայաստանում։
Այս երկու հանգամանքը՝ հետաքրքիր կյանք, հետաքրքիր երկիր, արժանապատիվ երկիր և քո ինքնության ընկալումը, հայի ընկալումը բերելու է նրան, որ շատ ավելի մարդ փորձելու է և ցանկանալու է մնալ Հայաստանում: Այդ երկու հանգամանքը պետք է իրար հանդիպեն»,- ասաց նա։
Մանրամասն՝ տեսանյութում։
