Այսօր՝ մարտի 21-ին, Աշտարակում «Հայաստան» դաշինքի՝ քաղաքացիների հետ հանդիպման ժամանակ քաղաքացիներից մեկը հարց ուղեց դաշինքի առաջնորդ, ՀՀ երկրորդ նախագահ Ռոբերտ Քոչարյանին՝ Արցախ վերադառնալու մասին։
«Ինչպե՞ս եք դուք պատկերացնում մեր վերադարձը։ Ի՞նչ ծրագրեր ունեք Արցախ վերադառնալու համար»,- հարցրեց Արցախից բռնի տեղահանված քաղաքացին։
«Վերադառնալու համար նախ պետք է ճանաչվի այդ վերադառնալու իրավունքը: Այսօր Հայաստանը՝ որպես պետություն, չի ուզում խոսել ընդհանրապես այդ թեմայի շուրջ: Վերադառնալու իրավունքը եթե չի ճանաչվում, ապա ընդհանրապես խոսել վերադառնալու մասին ուղղակի անհնար է։
Առաջնային հարցը, որ մենք տեսնում ենք հենց վերադառնալու իրավունքի ճանաչումն է, որը միջազգային իրավունքից է բխում և շատ դժվար է հերքել կամ մերժել այդ իրավունքի առկայությունը ընդհանրապես։ Դրանից հետո պետք է գնալ հետևյալով՝ վերադասվող մարդիկ պետք է անվտանգ լինեն, թե ոչ։ Ուրեմն խոսքը պետք է գնա անվտանգ վերադարձի մասին։
Սա է այդ տրամաբանությունը ընդհանրապես և այդ տրամաբանության շրջանակներում, այո, հնարավոր է այդ հարցը լուծել։ Ժամանա՞կ է պահանջվելու։ Այո, ժամանակ է պահանջվելու։ Դժվա՞ր է լինելու։ Շատ դժվար է լինելու։
Ես չեմ ուզում ավելորդ լավատեսություն հազորդել ձեզ, բայց իմ կյանքում այնպիսի դրվագներ են եղել, որ թվում էր, թե հարցը ընդհանրապես լուծում չունի, հետևողական աշխատանքով այդ հարցը լուծում ստանում է։ Եթե չես հավատում մի հարցի լուծմանը, երբեք այդ հարցը որևէ լուծում չի ստանալու։ Ուրեմն մոտեցումը, այդ ալգորիթմը, այդ հարցի կարգավորման այդպիսինն է։ Եվ հիմա մենք խոսում ենք վերադարձի իրավունքի ճանաչման մասին։ Դրանից պետք է սկսել»,- պատասխանեց «Հայաստան» դաշինքի առաջնորդը։
Մանրամասն՝ տեսանյութում։
