Մենք գիտենք, որ քաջարի ոգով մեր սրբազաններն այս պարագային, արդեն Արշակ արքեպիսկոպոսը եղավ արդեն չորրորդ սրբազանը, որ մեր սրբազաններն աննկուն են իրենց ոգով և քաջաբար դիմագրավում են բոլոր դժվարությունները` իրենց բաժին ընկած: Այս մասին «Զվարթնոց» օդանավակայանում հայտարարեց Ամենայն Հայոց Կաթողիկոս Գարեգին Բ-ն:
«Անվեհեր, հաստատուն հավատքով, որ արդարությունը պետք է հաղթանակի իրենց կյանքում և իրենք արդարացված դուրս պետք է գան, ազատ արձակվեն և վերադառնան եկեղեցանվեր ու ազգաշեն իրենց ծառայությանը: Մենք, սիրելիներ, մեր և մեր եկեղեցականաց ուղերձներում և հայտարարություններում բազմիցս կոչ ենք ուղղել իշխանություններին` վերջ դնելու հակաեկեղեցական գործողություններին, վերջ դնելու եկեղեցականների նկատմամբ իրագործվող բռնաճնշումներին, լռեցնելու նրանց արդար ձայնը, նաև` հարկադրելու եկեղեցու կարգաց և կանոնաց խախտմամբ գործողություններ կատարել:
Հակառակ ստեղծված այսպիսի դժվարին կացության` տեղ գտնող նման եկեղեցահալած քաղաքականության` մենք` որպես Հայրապետ Հայոց, եկեղեցական ազգային ժողովի կողմից տրված իշխանությամբ` մեր հոգևոր դասի հետ միասին, Մայր Աթոռ Սուրբ Էջմիածնի միաբանությամբ, թեմերում պաշտոնավարող եկեղեցականների հետ միասին պետք է շարունակենք մեր կոչմանն ու առաքելությանը հավատարիմ` մեր ծառայությունը բերել ժողովրդին:
Մենք հավատում ենք, որ ձեր հետ միասին, սիրելի հայորդիներ, մենք կարող պետք է լինենք արդարությունը, ճշմարտությունը, սերը, համերաշխությունը, եղբայրասիրությունը` որպես բարձր արժեքներ` դարձնել հիմնը` մեր ժողովրդի կյանքի և այդ արժեքների վրա խարսխել, կառուցել մեր հայրենիքի վաղվա լուսավոր ու պայծառ օրը»,- նշեց Վեհափառ Հայրապետը:
