Անցյալ շաբաթ Կիևում ուկրաինացի պաշտոնյաների հետ հանդիպման ժամանակ ԱՄՆ բանակի քարտուղար Դեն Դրիսկոլը մռայլ գնահատական է տվել, NBC News-ին հայտնել են իրավիճակին ծանոթ երկու աղբյուրներ։
Նա իր գործընկերներին ասել է, որ իրենց զորքերը մարտադաշտում դժվարին իրավիճակի առջև են կանգնած և անխուսափելի պարտություն կկրեն ռուսական զորքերի ձեռքով։
Աղբյուրների փոխանցմամբ՝ Դրիսկոլը նրանց հայտնել է, որ ռուսները մեծացնում են իրենց օդային հարձակումների մասշտաբն ու տեմպը, և որ նրանք ի վիճակի են անվերջ մարտեր վարել։ Նա շարունակել է, որ Ուկրաինայում իրավիճակը ժամանակի ընթացքում միայն վատանալու է և ավելի լավ է խաղաղ կարգավորման շուրջ պայմանավորվել հիմա, քան ապագայում հայտնվել էլ ավելի թույլ դիրքում։
ԱՄՆ պատվիրակությունը նաև հայտարարել է, որ ամերիկյան պաշտպանական արդյունաբերությունը չի կարողանա Ուկրաինային զենք և հակաօդային պաշտպանության (ՀՕՊ) միջոցներ մատակարարել այն ծավալներով, որոնք անհրաժեշտ են երկրի ենթակառուցվածքները և բնակչությունը պաշտպանելու համար։
«Հաղորդագրությունը հիմնականում հետևյալն էր. դուք պարտվում եք,- ասել է աղբյուրներից մեկը,- և դուք պետք է ընդունեք գործարքը», — նշել է աղբյուրը։
Դրիսկոլի հանդիպումն ուկրաինացիների հետ եղել է Թրամփի վարչակազմի որոշ պաշտոնյաների ջանքերի մի մասը, որպեսզի ճնշում գործադրեն ուկրաինացիների վրա՝ ստիպելով նրանց անհապաղ ընդունել ԱՄՆ-ի կողմից աջակցվող նոր խաղաղության առաջարկը, չնայած այն հանգամանքին, որ այն ներառում էր Ռուսաստանի մաքսիմալիստական պահանջները և պահանջում էր ցավոտ զիջումներ Կիևի կառավարությունից, հայտարարել են արևմտյան մի քանի գործող և նախկին պաշտոնյաներ։
Ուկրաինան քաղաքավարի կերպով հրաժարվել է ստորագրել խաղաղության ծրագիրը այն տեսքով, որով այն ներկայացվել է և առաջարկը զգալիորեն վերանայվել է անցյալ շաբաթ Դրիսկոլի և ուկրաինացի պաշտոնյաների միջև տեղի ունեցած բանակցություններից հետո։
Այս հանդիպումը դարձավ Թրամփի վարչակազմի ներսում առկա վաղեմի տարաձայնության հերթական օրինակը՝ կապված Ուկրաինայում պատերազմն ավարտելու եղանակի հետ։ Այս պառակտումը կապված է երկու պոտենցիալ նախագահի թեկնածուների՝ փոխնախագահ Ջեյ Դի Վենսի և պետքարտուղար Մարկո Ռուբիոյի միջև ծավալվող քաղաքական մրցակցության հետ, որոնք պատրաստվում են 2028 թվականի նախագահական պայքարին։
Մի շարք գործող և նախկին պաշտոնյաների խոսքով՝ մի ճամբարը, որտեղ ընդգրկված են Վենսը, հատուկ ներկայացուցիչ Սթիվ Ուիթքոֆը և այլ պաշտոնյաներ, կարծում են, որ խաղաղության ճանապարհի գլխավոր խոչընդոտն Ուկրաինան է և կողմ են, որ օգտագործվեն ԱՄՆ-ի ճնշման լծակները՝ Կիևին լուրջ փոխզիջումների դրդելու համար։
Մյուս ճամբարը, որը ներկայացնում են Ռուբիոն և այլ պաշտոնյաներ, պատասխանատու է համարում Ռուսաստանին և ասում, որ Մոսկվան կհանձնվի միայն այն դեպքում, եթե ստիպված լինի վճարել իր ագրեսիայի համար պատժամիջոցներով և այլ ճնշումներով։
«Որոշ ժամանակ պարզ էր, որ կա պառակտում, բայց մենք չենք տեսել դրա հրապարակային դրսևորումը, ինչպես վերջին մի քանի օրերին», — ասել է Արևելյան Եվրոպայում փորձ ունեցող ԱՄՆ նախկին ավագ դիվանագետը։
