ԱՄՆ-ն պատրաստվում է Իրանի ուղղությամբ լայնածավալ ռմբակոծությունների․ Արաբական ծովում գտնվող «Ջորջ Վաշինգտոն» (USS George Washington) ավիակրի վրա ակտիվորեն համալրվում են զինամթերքի պաշարները։
Ինչպես հայտնում է The Wall Street Journal-ը՝ հղում անելով ամերիկացի պաշտոնյաներին, նավաստիները մեծ քանակությամբ զինամթերք են բեռնում նավի վրա, այդ թվում՝ ցամաքային թիրախները խոցելու համար նախատեսված թևավոր հրթիռներ և ամրացված ստորգետնյա օբյեկտները ոչնչացնելու ավիառումբեր։
WSJ-ի լրագրող Շելբի Հոլիդեյը, որն այցելել է ավիակիր՝ մի բան, որը չափազանց հազվադեպ է տեղի ունենում, ականատես է եղել, թե ինչպես են ամերիկացի զինվորականները մեծ քանակությամբ սպառազինություն բեռնում և ավիացիան պատրաստում ռազմական գործողությունների հնարավոր վերսկսմանը։ ԱՄՆ ներկայացուցիչները հաստատել են, որ զինված ուժերը պատրաստվում են հարվածների նոր ալիքի։
WSJ-ի գնահատմամբ՝ խոսքը հենց այն զինատեսակների մասին է, որոնք անհրաժեշտ են Իրանի ստորգետնյա միջուկային օբյեկտների և լավ պաշտպանված ռազմական ենթակառուցվածքների դեմ գործողություն իրականացնելու համար։
