Իրանը պատրաստ է աջակցել Հայաստանի և Ադրբեջանի առաջարկած ցանկացած ձևաչափի՝ խաղաղության հաստատման, հրադադարի պահպանման և խաղաղության համաձայնագրի ստորագրման համար։ Դրա մասին ապրիլի 3-ին լրագրողների հետ զրույցում հայտարարել է Հայաստանում Իրանի արտակարգ և լիազոր դեսպան Մեհդի Սոբհանին։
Նրա կարծիքով՝ այդ առումով «3+3»-ը լավ ձևաչափ է, որի օգնությամբ հնարավոր է հասնել Երևանի և Բաքվի միջև խաղաղության համաձայնագրի ստորագրմանը։ Նա պարզաբանել է, որ Իրանը կողմ է սահմանին խաղաղության և հանգստության հաստատմանը և կարծում է, որ պետք է խուսափել լարվածության աճի հանգեցնսղ ցանկացած քայլից։
Դիվանագետը հույս է հայտնել, որ Հայաստանն ու Ադրբեջանը զսպվածություն կցուցաբերեն և կկարողանան անցնել խաղաղության համաձայնագրի ստորագրմանը։ « Մեր տարածաշրջանը չի դիմանա մեկ այլ լարվածության։ Հուսով ենք՝ բոլոր կողմերը հավատարիմ կմնան խաղաղությանն ու հանգստությանը միտված սկզբունքներին։ Մենք կապի մեջ ենք և՛ Հայաստանի, և՛ Ադրբեջանի հետ։ Մեր շփումների ընթացքում խրախուսում ենք կողմերին գնալ խաղաղության համաձայնագրի ստորագրմանը»,– ընդգծել է Սոբհանին։
