«Այսօր երկրում այնպիսի մի մթնոլորտ է, երբ մարդիկ իրար ատում են, չեն սիրում, թշնամություն են անում, և ակամայից դա հասնում է նաև խորհրդարան։ Առաջին իսկ օրվանից կուզենայի փոխել այդ մթնոլորտը երկրում, որպեսզի դա արտացոլվեր նաև այստեղ։
Ինչո՞ւ եմ սա ասում. հանձնաժողովի փոխնախագահ ենք ունեցել, ով հումորով, կատակով, նույնիսկ ամենախիստ քննադատությամբ հանդերձ՝ կարողանում էր աշխատել։ Ունենք փորձագետներ, որոնք այդ տարիներին աշխատել են և խոսքս կվկայեն. եթե սուտ եմ ասում, թող ասեն, բայց այդ քննարկումներից հետո ոչ մի թշնամանք կամ անհանդուրժողականություն չի եղել։
Հիմա անդրադառնամ մի քանի հարցի։ Իմ ընտանիքից մի պատմություն պատմեմ։ Հանրային ծառայությունները կարգավորող հանձնաժողովն ապօրինի որոշում էր կայացրել և 100 000 դրամով տուգանել մեր ընտանիքին։ Ինչո՞ւ եմ ասում ապօրինի. հետո դա օրինական ուժի մեջ մտավ, և մենք կրեցինք դրա հետևանքները։ Հայրս ասում էր. «թքա՛ծ ունեմ այդ 100 000 դրամի վրա, տա՛նք, պրծնենք, զզվել եմ. հո հինգ տարի դատարաններով չե՞նք ընկնելու»։ Հինգ տարի գնացինք դատարան ու ապացուցեցինք, որ ճիշտ ենք։ Հիմա ո՞րն էր օգուտը՝ 100 000 դրամը տա՞լը, թե՞ փաստաբանին 4 միլիոն դրամ վճարելը»,- ԱԺ Ֆինանսավարկային և բյուջետային հարցերի մշտական հանձնաժողովի նիստում ասաց «Հայաստան» խմբակցության պատգամավոր Մեսրոպ Մանուկյանը։
Մանրամասն՝ տեսանյութում։
