«Փաստ» օրաթերթը գրում է.
Արդարադատության նախարարությունն առաջարկում է փոփոխություններ և լրացումներ կատարել Քաղաքացիական և Վարչական դատավարության օրենսգրքերում։ Նախագծերով առաջարկվում է դրանցում բացահայտել գործերի քննության «ողջամիտ ժամկետ» եզրույթի բովանդակային ծավալը, այն է՝ սահմանել գործի քննության ուղենիշային ժամկետ՝ պատճառաբանված որոշմամբ այն երկարաձգելու հնարավորություն նախատեսելով հանդերձ, ինչը կարող է ունենալ գործերի քննության ողջամիտ ժամկետների, ըստ այդմ՝ արդար դատաքննության իրավունքի խախտումները կանխարգելող նշանակություն:
Նշվածը կկանխի գործերի քննության կամայական հետաձգումները՝ դատարանների համար ստեղծելով օբյեկտիվ պատճառներով գործի քննության ժամկետները երկարաձգելու պարտականություն, իսկ գործին մասնակցող անձանց համար կանխատեսելի դարձնելով իրենց իրավունքներին և պարտականություններին առնչվող վեճի հանգուցալուծման հնարավոր ժամկետը՝ ժամկետի երկարաձգման դեպքում երաշխավորելով նաև դրա հիմքերի մասին պատճառաբանված որոշում ստանալու իրավունքը: Մյուս կողմից նշվածը կարող է օժանդակ բնույթ կրել դատավորին կարգապահական պատասխանատվության ենթարկելու հարցի քննության շրջանակներում, եթե չհիմնավորվեն երկարաձգումների օբյեկտիվ հիմքերը:
Առաջարկվում է դատարաններում սահմանել քաղաքացիական և վարչական գործերի քննության հստակ ժամկետ՝ վեց ամիս: Դատարանները միայն պատճառաբանված որոշմամբ կարող են երկարաձգել այս ժամկետները՝ քաղաքացիական գործերով ոչ ավելի, քան երկու, իսկ վարչական գործերով՝ ոչ ավելի, քան երեք անգամ: Առաջարկվում է սահմանել գործերի քննության ուղենիշային ժամկետներ, իսկ դրանց երկարաձգումը թողնել դատավորի հայեցողությանը, որը սահմանափակված է օբյեկտիվ հանգամանքներով, որոնց առկայությամբ գործի քննության ժամկետը երկարաձգելու անհրաժեշտության վերաբերյալ պատճառաբանությունները պետք է նշվեն որոշման մեջ: Գործի քննության ժամկետը երկարաձգելու մասին համապատասխան կարգավորում սահմանելը ոչ միայն կունենա «զսպիչ» դեր՝ դատավարությունը պաշտպանելով անհարկի, կամայական ձգձգումներից, այլև գործի քննության ողջամիտ ժամկետներն ապահովելու նպատակին զուգահեռ միտված կլինի նաև ապահովել գործերի համակողմանի քննությունը: Մասնավորապես, գործի քննության ու լուծման ժամկետը պահպանելու անհրաժեշտությունը չպետք է բացասական ազդեցություն ունենա արդարադատության որակի վրա: Այդ պատճառով՝ նկատի ունենալով գործերի փաստական տարբերություններն ու առանձնահատկությունները, դրանց բարդության աստիճանները, դատական քննության ընթացքը դանդաղեցնող օբյեկտիվ հանգամանքների հնարավոր առկայությունը՝ նախատեսվում է գործի քննության ժամկետը յուրաքանչյուր անգամ ոչ ավելի, քան վեց ամսով երկարաձգելու հնարավորություն:
Մանրամասները՝ «Փաստ» օրաթերթի այսօրվա համարում
