«Հարց կա, որի մասին ուզում եմ խոսել առաջին օրվանից՝ թե վերջիվերջո Հայաստանի Հանրապետության սահմանները ինչ ուրվագիծ ունեն, և Հայաստանի Հանրապետության տարածքը որքան է։
Դուք ասում եք, որ տարածքը որոշվում է Ալմաթիի հռչակագրով, որը Խորհրդային Հայաստանի վարչական սահմանները դիտել է որպես պետական տարածքներ։ Չեմ ուզում հիմա խորապես դրան անդրադառնալ։
Շատ լավ։ Խորհրդային Միության ժամանակ վարչատարածքային բաժանման մասին ընդհանուր օրենք չի եղել։ Յուրաքանչյուր հանրապետության տարածքը որոշվել է իր Գերագույն խորհրդի որոշումներով, Մինիստրների խորհրդի որոշումներով և այլն, և այլն։ Բայց այդ որոշված տարածքները արձանագրվել են տարբեր տեղերում՝ օրինակ, Խորհրդային Միության ժամանակ հրապարակված քարտեզներում, պաշտոնական հրապարակային այլ փաստաթղթերում, հանրագիտարաններում։
Հանրագիտարանները հատուկ եմ նշում, որովհետև սահմանազատման ժամանակ, երբ խոսքը գնում էր այն մասին, թե ինչ վերաբերելի փաստաթղթեր են օգտագործվել, նշվել էին նաև հանրագիտարանները։
Ուստի ես ուզում եմ կարդալ։ Խորհրդային շրջանում հրապարակված հայկական հանրագիտարանում Հայաստանի Հանրապետության տարածությունը նշված է՝ 29 հազար 800 քառակուսի կիլոմետր։ Նմանապես նույնը գրված է «Խորհրդային մեծ հանրագիտարանում»։
Եվ «Խորհրդային Միության հանրագիտարանում», սա էլ 1979 թվականի հրապարակում է, նույնպես նշված է՝ 29 հազար 800 քառակուսի կիլոմետր։
Ինձ հետաքրքիր է՝ թե դուք տեղյա՞կ եք արդյոք, թե երբ շրջանառության մեջ մտավ 29 հազար 743 քառակուսի կիլոմետր թիվը։ Որովհետև 29 743-ը, որ կլորացնում ես, 29 700 է դառնում։ Ինձ հետաքրքիր է՝ այդ 57 քառակուսի կիլոմետրը ե՞րբ անհետացավ»,- այս հարցն է ուղղել ՔՊ-ական Արուսյակ Ջուլհակյանին ԱԺ «Հայաստան» խմբակցության պատգամավոր Արթուր Խաչատրյանը։
Մանրամասն՝ տեսանյութում։
