Քաղաքական մեկնաբան Հակոբ Բադալյանի թելեգրամյան գրառումը. «Հայաստանում Իրանի դեսպանը հայտարարել է, որ ակնկալում են Նիկոլ Փաշինյանի Իրան այցի ընթացքում հայ-իրանական ռազմավարական գործընկերության փաստաթղթի ստորագրում: Հիշեցնեմ, որ այդ փաստաթղթի մշակման ուղղությամբ աշխատանքի մասին ամիսներ առաջ հայտարարեց դեռեւս Իրանի նախկին դեսպան Սոբհանին:
Իրանի նոր դեսպանը շաբաթներ առաջ աչքի ընկավ մի կոշտ հայտարարությամբ, թե Իրանում մտածում են, որ Հայաստանը դառնում է հակաիրանական ուժերի կենտրոն: Նախօրեին ելույթ ունենալով Իրանի իսլամական հեղափոխության տարեդարձի հանդիսավոր միջոցառմանը, Իրանի դեսպանը խոսել է երկու երկրնեի ղեկավարների միջեւ փոխվստահության մասին:
Սա պարզապես հանդիսության առիթով արարողակարգային խո՞սք է, թե՞ կասկածը, որ Հայաստանը դառնում է հակաիրանական ուժերի կենտրոն, փարատվել է:
Բոլոր դեպքերում, հայ-իրանական հարաբերության համար վստահության մթնոլորտը չափազանց կարեւոր է, հատկապես առկա իրողությունների եւ զարգացումների ֆոնին: Այդ իմաստով կարեւոր կլինի, եթե կայանա Նիկոլ Փաշինյանի այց Իրան: Այդ մասին խոսելով, Իրանի դեսպանը չի նշել, թե հատկապես ի՞նչ ժամկետում է նախատեսվում այցը:
Բոլոր դեպքերում, ԱՄՆ փոխնախագահ Վենսի ռեգիոնալ այցից հետո դա կլինի թերեւս կարեւոր բալանսավորում, միաժամանակ հավաստիացնելով Թեհրանին, որ ԱՄՆ հետ պայմանավորվածությունները որեւէ կերպ չեն խաթարելու հայ-իրանական հարաբերության հեռանկարը եւ կայուն զարգացումը: Հիշենք նաեւ, որ Իրանի Գերագույն հոգեւոր առաջնորդի խորհրդական Վիլայաթին նախորդ տարեվերջին բավականին կոշտ էր խոսել Թրամպի ուղու մասին, Հայաստանի դեսպանի հետ հանդիպմանն ասելով, որ Թեհրանի համար չկա տարբերություն դրա եւ այսպես ասած «զանգեզուրյան միջանցքի» միջեւ:
Միաժամանակ հիշեցնեմ դիտարկումը, որ արել էի անցնող օրերին: Իրանի շուրջ լարված իրավիճակի ֆոնին Թեհրանը ակտիվ կոմունիկացիայի մեջ էր հարեւան գործնականում բոլոր երկրների հետ, բայց այդպես էլ չեղավ հեռախոսազրույց կամ հանդիպում Հայաստանի բարձրաստիճան պաշտոնյաների հետ: Դա վստահությա՞ն, թե՞ հակառակ ցուցիչ է»:
