Նոյեմբերի 3-ին վիճաբանություն-ծեծկռտուք է տեղի ունեցել Երևանում։ Այդ օրը ժամը 12:00-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Արաբկիրի բաժնում օպերատիվ տեղեկություններ են ստացվել, որ Բաղրամյան պողոտա 84 հասցեում գործող «Տապակա» ռեստորանի մոտ վիճաբանություն է տեղի ունեցել և կա դանակահարված քաղաքացի։
Ինչպես դեպքի վայրից հայտնում է ֆոտոլրագրող Գագիկ Շամշյանը, ժամանել է ոստիկանության Արաբկիրի բաժնի օպերատիվ խումբը՝ բաժնի պետ Ռուբեն Ներսիսյանի գլխավորությամբ։
Մինչ կժամանեին ոստիկանները, «Արմենիա» բժշկական կենտրոնից ահազանգ է ստացվում, որ Երևանի 103 շտապօգնության կողմից իրենց մոտ է տեղափոխվել մի քաղաքացի։
Արաբկիրի ոստիկանները մեկնում են հիվանդանոց, որտեղ բժիշկները տեղում հայտնում են, որ վիրավորը գտնվում է վիրահատարանում և ի վիճակի չէ կատարվածի մասին բացատրություն տալու։
Մինչ բժիշկները պայքարում էին վիրավորի կյանքի համար, Արաբկիրի համայնքային ոստիկանները պարզել են, որ նա Երևանի 24-ամյա Վահան Հ.-ն է, ով հիվանդանոց է տեղափոխվել «որովայնի առաջնային պատին կտրած-ծակած վերք, արյունահոսող» վնասվածքով։
Ոստիկանները պարզել են նաև, որ նույն օրը ժամը 11:00-ի սահմաններում նշված ռեստորանի մոտ կայանատեղիում «Hongqi» ավտոմեքենայի վարորդ՝ Գեղարքունիքի մարզի բնակիչ 25-ամյա Վարդան Մ.-ն ավտոմեքենան կայանելու հարցի շուրջ վիճաբանություն է ունեցել Վահան Հ.-ի հետ, որի ժամանակ դանակով հարվածներ է հասցրել Վահան Հ․-ին։
Ֆոտոլրագրողի տեղեկություններով՝ Արաբկիրի ոստիկանները ժամերի ընթացքում օպերատիվ տվյալներն իրացնելով պարզում են կասկածյալ Վարդան Մ.-ի գտնվելու վայրը և մեկնելով այնտեղ՝ կարողանում են հայտնաբերել ու ձերբակալել նրան և տեղափոխել ոստիկանության Արաբկիրի բաժին։
Դեպքի մասին ոստիկանության Արաբկիրի բաժնից տեղեկությունը փոխանցել են ՀՀ Քննչական կոմիտեի Երևան քաղաքի քննչական վարչության Արաբկիրի քննչական բաժին, որտեղ դեպքի փաստով «սպանության փորձ» հատկանիշներով նախաձեռնվել է քրեական վարույթ։
Ֆոտոլրագրողի տեղեկություններով՝ կասկածյալը ոստիկաններին է ներկայացրել հանցագործության գործիք դանակը։
Գ. Շամշյանի տեղեկություններով վիրավոր Վահան Հ.-ն աշխատում է «Տապակա» ռեստորանում։
