Ստամբուլում սեպտեմբերի 7-ի գիշերը սկսվել են հակակառավարական ցույցեր:
Հարյուրավոր ցուցարարներ հավաքվել են երկրի գլխավոր ընդդիմադիր ուժի՝ Հանրապետական ժողովրդական կուսակցության ( CHP) գլխավոր գրասենյակի մոտ, որտեղ սկսվել են բախումներ ոստիկանության հետ, ըստ որոշ տեղեկությունների՝ ոստիկանները կիրառել են արցունքաբեր գազ։ Բողոքի ակցիան ուղղված է Թուրքիայի առաջնորդ Ռեջեփ Թայիփ Էրդողանի քաղաքական որոշումների դեմ։
Թուրքական լրատվամիջոցների փոխանցմամբ՝ ակցիայի մասնակիցները բողոքում են ընդդիմադիր Հանրապետական ժողովրդական կուսակցության ղեկավարությանը պաշտոնանկ անելու որոշման դեմ, որի առաջնորդներից մեկը՝ Ստամբուլի նախկին քաղաքապետ Էքրեմ Իմամօղլուն, կալանքի տակ է մայիսից։
Ցուցարարները կոչ են անում «կաթսաների ակցիաների». նրանք քայլում են փողոցներով և թակում կաթսաներ՝ ի նշան իշխանությունների գործողությունների դեմ բողոքի։
«Ժողովրդահանրապետական» կուսակցության նախագահ Օզգյուր Օզելը հայտրարաել է. «Մենք չենք վախենում, չենք հանձնվում և չենք հանձնվի» և հավելել. «Ես բոլոր դեմոկրատներին, բոլոր CHP անդամներին հրավիրում եմ մեր նախնյավ տուն՝ Ստամբուլ։ Մենք կկանգնենք Հանրապետության վրա հարձակվողների դեմ»։
Այս կոչից հետո Թուրքիայի ներքին գործերի նախարար Ալի Յերլիքայան սոցցանցում գրառում է արել և նշել, որ մարդկանց փողոց դուրս բերելու փորձը օրենքի ակնհայտ խախտում է և ոչ ոք օրենքից վեր չէ։ «Պետությունը վճռականորեն կձեռնարկի անհրաժեշտ միջոցներ ցանկացած ապօրինի փորձի դեմ»։
Ցույցերին անդրադարձել է նաև Թուրքիայի Ռադիոյի և հեռուստատեսության բարձրագույն խորհրդի (RTÜK) նախագահ Էբուբեքիր Շահինը։ Նա նախազգուշացրել է հեռարձակողներին՝ նշելով, որ ոչ մի դեպքում թույլատրելի չեն լինի հեռարձակումները, որոնք սպառնում են հասարակական կարգին և հրահրում բռնություն։
Ստամբուլի նահանգապետարանը ևս հանդես է եկել հայտարարությամբ, որտեղ նշվել է, որ բողոքի ցույցերի համար եռօրյա արգելք է հայտարարվել վեց շրջանում։
Բացի այդ ողջ Թուրքիայում խնդիրներ կան սոցիալական ցանցերի մասնավորապես X, Instagram, TikTok, YouTube և WhatsApp հասանելիության հետ կապված։
