Տեղեկացնեմ, որ մի քանի խնդիրներ, որոնք ներկայացրել էինք, դատարանը պահանջել է նաև դրանց հիմնավորումները ներկայացնենք, այդ թվում 17 հազար գաղտնի քվեարկությունների վերաբերյալ։ Այս մասին Սահմանադրական դատարանի մոտ լրագրողների հետ զրույցում ասել է փաստաբան Արամ Վարդևանյանը։
«Վարչական ռեսուրսի չարաշահումը, ատելության խոսքի տարածումը ունեցել է էական ազդեցություն ընտրությունների արդյունքների վրա։ Նրանք պաշտոններից են խոսում, այն պայմաններում, երբ ՍԴ-ն կարող է նոր ընտրությունների հիմքը հանդիսանալ»,- նշել է Վարդևանյանը։
Վարդևանյանը հայտարարել է նաև, որ ՔՊ-ն, մասնակցելով որպես երրորդ անձ, չի ներկայացրել դիրքորոշում, որ տեղի է ունեցել այնպիսի ընտրական հանցագործություններ, որոնք ազդել են ընտրությունների արդյունքների վրա։
«Հերթական անգամ քաղաքական գնահատականներ և իրականություն, քաղաքական գնահատական և իրական դատողություն՝ հակադրության մեջ են այս քաղաքական ուժի դեպքում։ Խոսքն ընտրակաշառքների և այլ երևույթների մասին է։ Այն, որ իրենց կողմից ընտրախախտումներ իրականացվել են, որոնք ազդել են ընտրությունների արդյունքների վրա՝ փաստ է։
Մենք ՔՊ-ից տարբերվում ենք նաև նրանով, որ ՍԴ ինստիտուտը պետք է հարգել՝ անկախ բովանդակությունից, գոնե ձևական մասը պետք է հարգել»,- նշել է նա։
