Այս նկարները ավելի քան խոսքերը կարող են նկարագրել մեր անվտանգային համակարգի այսօրվա թշվառ վիճակը, ինչպես նաև «Ուժեղ Հայաստան» կուսակցության՝ ուժեղ Հայաստան կառուցելու տեսլականը։ Այս մասին այսօր՝ մարտի 18-ին, Սամվել Կարապետյանի «Ուժեղ խաղաղություն» անվտանգության ծրագրի շնորհանդեսի ընթացքում ասաց «Ուժեղ Հայաստան» կուսակցության անդամ Արեգա Հովսեփյանը՝ ներկայացնելով բեմի վրա տեղադրված նկարները, որոնցում հիմնականում պատկերված են Արցախում ռմբակոծության կադրեր։
«Այստեղ սերունդներ են մեծացել, այսօր այդ շենքը չկա, հողին է հավասարեցվել, որովհետև Հայաստանում թույլ և Հայաստանի ազգային շահերը չսպասարկող իշխանություններ են։ Իսկ կողքի նկարում պատկերված օրը շատերը կհիշեն, երբ ցնծություն էր Արցախում, որովհետև տարածաշրջանում ունիկալ հիվանդանոց կառուցվեց Սամվել Կարապետյանի կողմից և հազարավոր հայ զինվորներ իրենց կյանքը կարողացան փրկել այս հիվանդանոցում։
Մենք տեսնում ենք, թե ինչպես մի երկրում, որի շուրջը տեղի են ունենում աշխարհաքաղաքական լրջագույն փոփոխություններ, հին և նոր հակամարտությունների ռիսկայնությունը ակնհայտորեն բարձրանում է, ներկայիս վարչապետը որոշում է նվազեցնել պաշտպանական բյուջեն։
Իսկ Հայաստանի հաջորդ վարչապետ Սամվել Կարապետյանը խոստանում է մեծացնել այն, մեծացնել Հայաստանի Հանրապետության պաշտպանական բյուջեն»,- ասաց նա։
Հովսեփյանը նաև ներկայացրեց ՍՈւ 30 կործանիչները, որոնց գնման համար քամուն են տրվել 200 միլիոն ԱՄՆ դոլար։ «Դրանք սակայն չեն օգտագործվել պատերազմի ժամանակ, պատճառաբանելով, որ հրթիռները չկային։ Փաստացի այդքան գումարը տրվել է բացառապես սելֆիների համար։
Մենք առաջարկում ենք խելամիտ իրականացնել ծախսերը, նույն այդ գումարով հնարավոր էր գնել բազմաթիվ հարվածային և հետախուզական ԱԹՍ-ներ, հակաօդային հրթիռներ և այլն, որոնք որ իրապես օգուտ կտային մեր բանակին»։
Մանրամասն՝ տեսանյութում։
