Կառավարության այսօրվա՝ օգոստոսի 13-ի նիստում Նիկոլ Փաշինյանն ասաց․ «Այսօր ՀՀ-ում և մասնավորապես՝ Երևանում բնակարան ձեռք բերելը դառնում է թրենդային։ Ուրախությամբ պետք է արձանագրեմ, որ նաև բազմաթիվ օտարերկրյա քաղաքացիներ, հիմնական մասը, իհարկե, սփյուռքի մեր ներկայացուցիչները, անշարժ գույք են ձեռք բերում Հայաստանում։ Դա, իհարկե, կապված է միջազգային թրենդների հետ, բայց նաև կապված է նրա հետ, որ Հայաստանի գրավիտացիոն ուժն աճում է»։
Կադաստրի կոմիտեի վիճակագրությունն իրոք ցույց է տալիս, որ Երևանում անշարժ գույքի գներն աճում են, հատկապես՝ հունիս ամսից։ Ոլորտի փորձագետները, սակայն, դա կապում են ոչ թե «Հայաստանի գրավիտացիոն ուժի հետ» կամ համարում են, թե «ՀՀ-ում և մասնավորապես՝ Երևանում բնակարան ձեռք բերելը դառնում է թրենդային», ինչպես որ համարում է Փաշինյանը, այլ հետաքրքրության աճի գլխավոր և գրեթե միակ պատճառ նշում են դեռևս ֆեյքային լուրերը։
Բանն այն է, որ վերջին ամիսներին ինտենսիվ լուրեր են տարածվում, թե ՌԴ-ում այս աշնանը սպասվում է լայնամասշտաբ զորահավաք՝ Ուկրաինայի դեմ ռազմական գործողությունը նոր թափով շարունակելու համար։ Այդ ֆեյքային լուրերը, պաշտոնական Մոսկվան բազմիցս հերքել են, սակայան համառորեն շարունակում են տարածվել, այդ թվում՝ Հայաստանում, հատկապես՝ իշխանական ֆեյքերի կողմից։
Այդ լուրերի ֆոնին ՌԴ-ում բնակվող բազմաթիվ քաղաքացիներ լքում են երկիրը։ Նրանց մի մասն էլ ուղևորվում է Հայաստան, ինչպես որ դա արեց նաև 2022 թվականին՝ պատերազմի մեկնարկից ի վեր (իհարկե՝ նրանց մեծ մասը հետո լքեց Հայաստանը՝ բողոքելով բնակարանների վարձերի, ապրանքի գնաճից և մի շարք այլ դժվարություններից)։ Հիմա՝ նոր, չհայտարարված, բայց աղմուկ հանած զորահավաքին ընդառաջ Հայաստան են գալիս ՌԴ քաղաքացիներ, վարձակալում բնակարաններ (ինչի պատճառով բնակվարձը ևս թանկացել է), ով ունի հնարավորություն՝ տուն է գնում, ինչի պատճառով անշարժ գույքի գներն աճել են։
Ըստ մեր զրուցակից մասնագետների, անշարժ գույքի թանկացման գլխավոր պատճառը սա է։
