ԱՄՆ պետքարտուղար Մարկո Ռուբիոն հայտարարել է, որ պատրաստ է հանդիպել Ռուսաստանի արտգործնախարար Սերգեյ Լավրովի հետ Ֆիլիպիններում՝ Հարավարևելյան Ասիայի պետությունների ասոցիացիայի միջոցառումների շրջանակում։
«Վստահ չեմ, որ դա վերջնականապես համաձայնեցված է։ Բայց մենք պատրաստ ենք հանդիպել նրանց հետ։ Իհարկե», — ասել է Ռուբիոն՝ պատասխանելով լրագրողների այն հարցին, թե արդյոք պատրաստ է Ֆիլիպիններում նշված հանդիպումների շրջանակում հանդիպել Լավրովի կամ Չինաստանի արտգործնախարար Վան Իի հետ։
Ինչպես ավելի վաղ հայտնել էր ԱՄՆ պետդեպարտամենտը, ամերիկյան դիվանագիտության ղեկավարը հուլիսի 19-23-ը գտնվելու է Մանիլայում։ Նա, ի թիվս այլնի, երկկողմ հանդիպումներ է ունենալու Ասիական-խաղաղօվկիանոսյան տարածաշրջանի մի շարք երկրների պաշտոնատար անձանց հետ։
Լավրովը նույնպես կմասնակցի Մանիլայում անցկացվող նախարարական մակարդակի որոշ միջոցառումների։ Ինչպես ավելի վաղ հաստատել էր ՌԴ ԱԳՆ պաշտոնական ներկայացուցիչ Մարիա Զախարովան, հուլիսի 21-ից 23-ն ընկած ժամանակահատվածում Լավրովը մասնակցելու է այդ միջոցառումներին։
