ԱԺ-ում այսօր քննարկվել է վարորդական իրավունքի վկայականից զրկված վարորդներին վերաբերող՝ Փաշինյանի նախընտրական խոստումն ամրագրող օրինագիծը, այն է՝ վարորդներին հնարավորություն տալ վերականգնել վկայականները միայն պետական տուրք վճարելու միջոցով։ Օրինագիծը ԱԺ-ում ներկայացրել է ՆԳ նախարար Արփինե Սարգսյանը։
«Պետք է փաստեմ, որ մենք փորձել ենք այս օրենսդրական նախաձեռնությամբ հնարավորինս բալանսավորված լուծում առաջարկել մոդելի փոփոխության տեսանկյունից։ Այս պահի դրությամբ վարորդական իրավունքը հնարավոր է վերականգնել բացառապես տեսական և գործնական քննությունները հանձնելու պայմաններում, սակայն միջազգային պրակտիկայում կան տարբեր օրինակներ՝ այդ թվում վարորդական իրավունքից զրկված անձանց համար վերապատրաստումների կազմակերպում, փորձաշրջանի տրամադրում սահմանափակ հնարավորություններով, ալկոհոլային սարքերի տեղադրման և այլ լուծումներ։
Եվ ի վերջո մեր քննարկումների արդյունքում կանգ ենք առել հետևյալ մոդելային լուծման վրա․ զրկման ժամկետը լրանալուց հետո, այն է՝ որպես կանոն մեկ տարի, բացառիկ դեպքերում՝ երկու տարի, անձը պետք է վճարի 50 000 դրամ պետական տուրք։ Այնուհետև սահմանվում է մեկ տարվա փորձաշրջան, որի ընթացքում անձին տրամադրվում է վեց բալային միավոր՝ սահմանափակ միավորներ, որպեսզի նա ցույց տա, որ իր վարքագիծը փոխվել է և կարող է վերադառնալ լիարժեք երթևեկության համակարգ»,- ասել է Սարգսյանը։
Նրա պնդմամբ՝ եթե փորձաշրջանի ընթացքում ամեն ինչ հարթ է ընթանում, ապա հաջորդ տարվա կտրվածքով վերականգնվում է 13 բալը։
«Իսկ եթե փորձաշրջանի ընթացքում անձը կրկին զրկվում է վարորդական իրավունքից կամ սպառվում են բալերը, ապա դա համարվում է կրկնակի զրկում, և անձը չի կարող օգտվել վարորդական իրավունքից։ Հետագա վերականգնումը կարող է իրականացվել արդեն տեսական և գործնական քննությունների պարտադիր վերահանձմամբ, քանի որ այդ դեպքում արդեն ունենք ավելի խորքային խնդիր՝ անձի գիտելիքների և հմտությունների հետ կապված։ Նախագիծը ունի անցումային դրույթ, որը վերաբերում է 2020 թվականի հունվարի 1-ից հետո զրկված անձանց»,- ասել է նա։
