Մենք թեոկրատիկ երկիր չենք, աշխարհիկ երկիր ենք և աշխարհիկ իշխանությունն իրավունք չունի մտնելու հոգևոր աշխարհ։ Այս մասին ԱԺ-ում լրագրողների հետ զրույցում նշեց ՔՊ-ից հեռացված Հակոբ Ասլանյանը՝ անդրադառնալով վարչապետ Նիկոլ Փաշինյանի հայտարարությանը, թե պետք է եկեղեցու հավատավոր հետևորդներից համակարգող խումբ ձևավորել, որը պետք է զբաղվի Գարեգին Բ կաթողիկոսին վեհարանից հանելու խնդրով։
«Ես գտնում եմ, որ այն, ինչ այսօր արվում է Հայոց եկեղեցու հանդեպ, դա շատ մեծ սխալ է։ Այստեղ տարբերակենք հայոց եկեղեցին և եկեղեցականը։ Վարչապետ ես, ինչ ես, վարչապետը իրավունք չունի մտնելու հոգևոր դաշտ։ Դա հոգևոր դաշտի տիրույթն է, եթե դժգոհություն կա, դա որոշելու են եպիսկոպոսները, արքեպիսկոպոսները, հոգևորականությունը և ժողովուրդը։
Իրականում այս գործընթացի հիմքում շատ ավելի խորը բան կա. Նիկոլ Փաշինյանը իմ կարծիքով պատրաստվում է հակապետական գործ անելու, և փորձում է Եկեղեցուն մի կողմ հրել, որպեսզի եկեղեցին չդառնա խոչընդոտ իր այդ գործողությունների համար:
Մենք այսօր ամեն ինչ անում ենք և փորձում ենք միավորել հենց այդ ուժերը, որ թույլ չտանք անել այն, ինչը փորձ է արվում անել։ Այսօր նրա գործողություններին հակազդելու միակ ռեալ ուժը եկեղեցին է, և նա ցանկություն ունի եկեղեցուն էլ մի կողմ տանել»,- ասաց նա։
Հարցին՝ ի՞նչ է ուզում անել վարչապետը, որ եկեղեցուն էլ վերացնում է իր ճանապարհից, Ասլանյանը պատասխանեց. «Նայեք, ասենք Ադրբեջանի հոգևոր ղեկավարության հայտարարությունները, որ արդեն ստեղծվել է արևմտյան Ադրբեջանի թեմ։ Նիկոլ Փաշինյանը մի ցանկություն ունի ամեն գնով խաղաղության այս պայմանագիրը կնքել, որպեսզի վերընտրվի։ Սա ամբողջությամբ տանում է միայն վերընտրման, նորից իշխանության ուզուրպացման գործին»։
Մանրամասն՝ տեսանյութում։
