Ի դեպ, վերջին շրջանում Հայաստանի բարձրաստիճան պաշտոնյաները հաճախ են խոսում անկլավների մասին։ Փաշինյանը Ազգային ժողովի ամեն քառօրյանի ժամանակ և կառավարության ամենշաբաթյա նիստերին հաջորդած ճեպազրույցներում դրանից է խոսում, երեկ Արարատ Միրզոյանն էր դրանից խոսում, այսօր՝ Ալեն Սիմոնյանը։
Հետաքրքիր է այն, թե ինչ համատեքստում են նրանք խոսում այդ թեմայից։ Հայաստանի իշխանությունները հայտարարում են, որ տեսականորեն հնարավոր է Ադրբեջանի հետ իրականացնել տարածքների համարժեք փոխանակում։
Առավել հետաքրքիր է այն, թե ինչ են խոսում այդ նույն օրերին հարևան երկրում՝ Ադրբեջանում։
Բաքվում շարունակում են հնչել տարածքային պահանջներ Հայաստանի նկատմամբ, շարունակվում է «Արևմտյան Ադրբեջան» թեզի շրջանառությունը։ Վերջերս էլ Իլհամ Ալիևը հայտարարում էր, թե Հայաստանի ներկայիս իշխանությունները փորձել են վիրավորել ադրբեջանական ժողովրդին։
Այսինքն՝ Ադրբեջանում խոսում են հնարավոր ու անհնար բոլոր թեմաներից՝ Հայաստանի նկատմամբ տարբեր պահանջներից, պատմական ու տարածքային հարցերից, բացի ՔՊ-ի կողմից առաջարկվող տարածքների «համարժեք փոխանակումից»։
Իսկ գուցե Ադրբեջանը չի խոսում այդ «համարժեք փոխանակման» մասին, որովհետև չի՞ պատրաստվում Հայաստանին ոչ մի թիզ հող հանձնել նույնիսկ համարժեք տարածք ստանալու պարագայում։ Հայաստանում էլ այդքան ակտիվ են խոսում, որովհետև գուցե պատրաստ են ոչ թե փոխանակել, այլ միանգամից հանձնել ինչ ունեն։
Սակայն դա, արդեն, կարծում ենք, ոչ թե վերլուծաբանների այլ իրավապահների տիրույթի հարց է։
