Ես համաձայն չեմ այն կարծիքի հետ, թե ռուս-հայկական հարաբերությունների վատթարացման համար մեղավոր են երկու կողմերը՝ և՛ Ռուսաստանը, և՛ Հայաստանը։ Այս մասին հայտարարել է ԱՊՀ երկրների ինստիտուտի տնօրեն, ՌԴ Պետդումայի պատգամավոր Կոնստանտին Զատուլինը։
«Հայաստանի կառավարության ղեկավարը ներկայիս քաղաքական ուղին ընտրել է ոչ պատահականորեն և ոչ էլ 2020 թվականի իրադարձությունների ազդեցությամբ։ Սա այն քաղաքական գործչի գիտակցված ուղին է, որն իր ողջ կարիերան կառուցել է Ռուսաստանի հետ հարաբերությունները քանդելու և Եվրոպային կամ Ամերիկային ավելի մոտենալու ցանկության վրա։ Ամեն դեպքում՝ փոխելու Հայաստանի արտաքին քաղաքական կողմնորոշումը և հրաժարվելու հայկական ողջ անցյալից»,- նշել է Զատուլինը։
Պատգամավորի կարծիքով՝ այս ամենի միակ դրական կողմն այն է, որ այսօր Ռուսաստանում՝ բոլոր մակարդակներում՝ թե՛ փորձագիտական, թե՛ պաշտոնական, լիակատար հստակություն է մտել Փաշինյանի կառավարության հետ հարաբերությունների և դրանից բխող Ռուսաստանի Դաշնության գործողությունների հարցում։
«Հայաստանի իշխանությունները ցանկանում են օգտագործել Ռուսաստանի Դաշնությանը, խաբել Ռուսաստանին և Եվրասիական տնտեսական միության մյուս դաշնակիցներին՝ արտոնյալ տնտեսական կապերից օգուտ քաղելով՝ վճարելու համար Հայաստանի՝ մի ճամբարից մյուսը տեղափոխվելու գործընթացը։ Եթե նախկինում՝ Ուկրաինայի հետ կապված իրադարձություններից և հատուկ ռազմական գործողությունից առաջ, կարող էինք կարծել, որ ՆԱՏՕ-ն և Եվրամիությունը նույն բանը չեն, ապա այսօր ակնհայտ է, որ ԵՄ-ն մեր հակառակորդն է, թշնամին»,- ընդգծել է քաղաքական գործիչը։
Զատուլինը նշել է, որ Ռուսաստանը Հայաստանի նկատմամբ կիրականացնի այն որոշումները, որոնք անհրաժեշտ կհամարի սեփական տնտեսության և Եվրասիական միության զարգացման համար։ Միևնույն ժամանակ, Ռուսաստանը ամեն կերպ կզարգացնի Հայաստանի հետ մշակութային կապերը։
Ինչ վերաբերում է Փաշինյանին, ապա, ըստ Զատուլինի, նա ստիպված է լինելու պատասխան տալ իր գործողությունների համար։
«Խորապես ցավալի է, որ նա պատասխան է տալու ոչ միայնակ, այլ ամբողջ Հայաստանի հետ միասին»,- նշել է նա։
