Հայաստանում հայրենասիրությունը ձեւավորվել է որպես ֆորպոստ՝ Ստալինի ամբիցիաները բավարարելու համար, ինչ որ ֆորումի ժամանակ ասում է Նիկոլ Փաշինյանը։ Գրում է քաղաքագետ Հակոբ Բադալյանը։

Ընդ որում, դահլիճի մեծամասնությունը կարծես թե երիտասարդներ են, որոնց մեծամասնությունն էլ թերեւս ամենեւին քաջատեղյակ չեն պատմությանը, ինչը որոշակի իմաստով նաեւ բնական է, օբյեկտիվ։ Երիտասարդները պատմության «գուրուներ» չեն կարող լինել, հետեւաբար շատ կարեւոր է, թե նրանց ով եւ ինչպես է մատուցում պատմությունը եւ դրա հետ կապված մյուս երեւույթները, դրանից բխող, ածանցվող իրողությունները, հետեւությունները եւ այլն։

Եվ ըստ էության, դահլիճում գտնվող երիտասարդները այդ իմաստով սպառելու են այն, ինչ «մատուցում» է Փաշինյանը։ Թե ինչ է մատուցում Փաշինյանը, թերեւս հայտնի է միայն իրեն, որովհետեւ ընդհանուր ջանքով հնարավոր է հասկանալ, որ նա ասում է հետեւյալը՝ հայրենասիրությունը մեզանում Ստալինն է ներարկել՝ մեզ ֆորպոստ դարձնելու նպատակով, եւ քանի որ հայրենասիրությունը Ստալինի ծնունդ է, պետք է հրաժարվել դրանից։ Ըստ էության, երիտասարդության շրջանում Նիկոլ Փաշինյանը հայրենասիրությունը որակում է «ստալինիզմ», խաղալով թերեւս Ստալինի անվան բացասական ընկալման վրա։

Մի կողմ թողնենք այն, որ Փաշինյանն ինքն իր քաղաքական գործունեության հետեւանքով փաստացի վերականգնել է այն ստատուս–քվոն, որ ըստ էության գծել է Ստալինը՝ Արցախը վերադարձնելով Ադրբեջանին, ինչը «խախտվել» էր հենց այն հայրենասիրությամբ, որը մեզ փաստորեն «դավադրաբար» ներարկել էր Ստալինը՝ ըստ Փաշինյանի։ Եթե նկատեք, ապա Նիկոլ Փաշինյանը երիտասարդների մոտ մեզանում գոյություն ունեցած հայրենասիրությունը վերածում է ինչ որ «հնդկական ֆիլմի», խճճելով պատկերը եւ խաղադրույք լկատարելով Ստալին անվան «բացասական մոգական» ազդեցության վրա։

Այս ամենն իրականում մի կարեւոր բանի ցուցիչ է։ Հայաստանում պետք է ընդդիմադիր աշխատանքի կարեւորագույն ուղղություն լինի երիտասարդությունը, հանգամանալից, համբերատար քաղաքական, քաղաքագիտակն, պատմական, եւ առհասարակ՝ լայն «ուսումնա–վարժական» ծրագրեր, սեմինարներ, քննարկումներ, պարզապես մտերմիկ խոսակցություններ, լայն շրջանակով, հետեւողական, համակարգային։ Պետք է երիտասարդության հետ աշխատել, նրանց պատկերացումները հայրենիքի, պետության, հայրենասիրության ու պետականապաշտության վերաբերյալ պատկերացումները մանիպուլյացիաներից եւ «հնդկական սերիալների» ոլորապտույտներից դուրս բերելու եւ առողջ ու ընդգրկուն միջավայր ներառելու համար։