Մոլդովայի խորհրդարանը վերջնական ընթերցմամբ հավանություն է տվել ԱՊՀ հիմնարար պայմանագրերից՝ Համագործակցության ստեղծման մասին համաձայնագրից, կանոնադրությունից և Ալմա-Աթայի հռչակագրից դուրս գալու օրինագծերին: Նման որոշում է կայացվել պատգամավորների ձայների երկու երրորդով՝ նիստի ժամանակ, հայտնում է ՏԱՍՍ-ը։
«Չեղարկվում են 1991 թվականի դեկտեմբերի 8-ին Մինսկում ստորագրված Անկախ Պետությունների Համագործակցության ստեղծման մասին համաձայնագիրը և 1991 թվականի դեկտեմբերի 21-ին ստորագրված Անկախ Պետությունների Համագործակցության ստեղծման մասին համաձայնագրի արձանագրությունը: Չեղարկվում է Անկախ Պետությունների Համագործակցության կանոնադրությունը, որն ընդունվել է Մինսկում 1993 թվականի հունվարի 22-ին»,- ասվում է օրինագծերում:
Երկրի նախագահի կողմից այս որոշումների հաստատումից և դրանց ուժի մեջ մտնելուց հետո հանրապետությունը պետք է այդ մասին տեղեկացնի ԱՊՀ գործադիր կոմիտեին՝ Համագործակցությունից դուրս գալուց 12 ամիս առաջ:
Միևնույն ժամանակ, հանրապետությունը նախատեսում է պահպանել մասնակցությունը մի շարք համաձայնագրերում, որոնք վերաբերում են տնտեսական հարաբերություններին, մասնավորապես՝ ազատ առևտրի գոտու մասին պայմանագրին:
ՌԴ ԱԳՆ պաշտոնական ներկայացուցիչ Մարիա Զախարովան Քիշնևի քաղաքականությունն անվանել է երկերեսանի՝ նշելով, որ հանրապետության իշխանությունները չեն շտապում հրաժարվել Համագործակցությանը մասնակցելու սոցիալ-տնտեսական առավելություններից՝ միևնույն ժամանակ հայտարարելով կազմակերպությունը լքելու ձգտման մասին:
