«Արդյո՞ք պետությունը լավ կառավարիչ է, արդյո՞ք պետական պաշտոնյաները, մասնավոր ոլորտին վերաբերող ծառայությունների տեսանկյունից, լավ կառավարիչ են․ Միջազգային փորձն, օրինակ, այս հարցին ուղիղ պատասխան է տվել, որ՝ ոչ։
Ավելին, միջազգային փորձն ասում է, որ այդ ամենից իրապես կոմունիզմի կամ «կարմիր» մշակույթի հոտ է գալիս։ Հիմա ո՞նց է ստացվում, որ Հայաստանի Հանրապետությունը սրընթաց այդ ուղղությամբ է գնում։ Կա՛մ պետության կողմից նշանակվում են կառավարիչներ, կա՛մ պետությունը փայատեր է դառնում հիմնարկներում։ Այս մոդելը որտե՞ղից է վերցվել․ չէ՞ որ ասում են՝ միջազգային լավագույն փորձ (best practice)․ հա, այդ որտե՞ղից է գալիս։ Օրինակ, կասե՞ք ինձ եվրոպական ժամանակակից մի երկիր, օրինակ՝ Շվեդիան, որն ամեն կերպ ուզում է մասնավոր ընկերություններում փայաբաժին ունենալ․ ոնց որ թե չի լինում, չէ՞։ Բա ինչո՞ւ է Հայաստանի Հանրապետությունը սրընթաց այդ ուղղությամբ գնում։
Կարծես թե պատգամավորներից մեկը մի դիրքորոշում ներկայացրեց՝ ասելով․ «Դե «Հայփոստը» ի վերջո պետության սեփականությունն է, հետևաբար ծառայությունները պետք է լինեն շատ լավը, հետևաբար վարձատրությունն էլ պետք է լինի շատ բարձր»։ Այս ֆորմուլան շատ հետաքրքիր է, ի դեպ՝ իրականությանն էլ մոտ։
Իսկ կասե՞ք ինձ՝ կառավարիչներին ներկայացվող պահանջները որո՞նք են, չափորոշիչները որո՞նք են։ Օրինակ՝ Ազգային ժողովի պատգամավոր կարող է լինել X, Y պահանջներին համապատասխանող անձը։ Իսկ ասեք՝ պետության կողմից որակյալ ծառայություն և բարձր վարձատրություն ենթադրող անձանց նշանակման չափանիշը ո՞րն է։
Եթե անկեղծ լինենք մեր հայրենակիցների հետ, հարգելի՛ գործընկերներ, դուք վերջին տարիներին արդեն բացահայտել եք դրա չափանիշը։ Դա մեկն է՝ «Քաղաքացիական պայմանագիր» կուսակցության անդամ լինելը կամ դրա հետ փոխկապակցված լինելը։»,- այս մասին ԱԺ իր ելույթում ասաց «Ուժեղ Հայաստան» խմբակցության պատգամավոր Արամ Վարդևանյանը։
Մանրամասն՝ տեսանյութում։
