Մենք մեզ հաշիվ ենք տալիս, որ մենք չենք կարող միևնույն ժամանակ լինել Եվրամիության և Եվրասիական տնտեսական միության անդամ։ Այս մասին այսօր՝ հունվարի 14–ին, «Հայաստանը և խաղաղությունը ռիսկերի ու հնարավորությունների խաչմերուկում» խորագրով ՄԱՀՀԻ անվտանգային ֆորումի շրջանակում իր խոսքում նշեց վարչապետ Նիկոլ Փաշինյանը։
«Բայց հիմա ուրիշ իրողություն է պարզվում, որ այնուամենայնիվ տարածք կա և դեպի ԵՄ անդամակցության ճանապարհով գնալ, և լինել ԵԱՏՄ անդամ։ Եվ մենք հիմա այսօր այդ տարածքի մեջ ենք։ Մենք հստակ հայտարարում ենք, ձև չենք անում, որ գնում ենք այս ճանապարհով։
Մենք այսօր ԵԱՏՄ անդամ ենք, ինչ նշանակում է որ այս կետում անհամատեղելիություն չկա, հակառակ դեպքում դա հնարավոր չէր լինի։ Հետևաբար այնքան ինչքան համատեղելիությունը հնարավոր կլինի, մենք կշարունակենք նաև մնալ ԵԱՏՄ անդամ։ Երբ այլևս համատեղելիության անհնարինություն կարձանագրի, մենք Հայաստանի Հանրապետության քաղաքացիների հետ կկայացնենք այն որոշումը, որը կբխի Հայաստանի ժողովրդի ազատ կամարտահայտությունից։
Իմիջիայլոց, ես դա էլ չեմ ուզում թաքցնել և չեմ ուզում դիվանագիտական սեթևեթանքի ժանրին տրվեմ, մեր կառավարության մեծագույն առաքելություններից մեկը ես համարում եմ այն, որ Հայաստանի Հանրապետությունը և ՀՀ ժողովուրդը ունենա ընտրություն։
Ընդհանրապես մեր նորանկախ շրջանի ամենակարևոր արձանագրումներից մեկը այն է, որ մեզ անընդհատ ներսից ու դրսից ասում են՝ դե մենք տարբերակ չունենք։ Ոչ, մենք ունենք տարբերակներ և մեր կառավարության մեծագույն առաքելությունը ես համարում եմ այն, որ մեր ժողովուրդը այդպես շիվարածի կարգավիճակով չլինի։
Մենք ունենք տարբերակներ, մեր այս ընթացքը ցույց տվեց, որ մենք ունենք տարբերակներ և մենք այդ տարբերակների մենյուն ստեղծում ենք Հայաստանի ժողովրդի համար։ Մենք նաև այդ մենյուի մեջ մենք առաջնորդում ենք և ասում ենք, որ այո, քանի որ ժողովրդավարությունը մեզ համար ընդամենը հանգամանքների, պատահական հանգամանքների բերում չէ, այլ մեզ համար ռազմավարություն է, բնականաբար ժողովրդավարական երկիրը ձգտում է լինել ժողովրդավարական երկրների միջավայրում, և մենք գնալու ենք այս ճանապարհով»,– հայտարարեց Փաշինյանը։
