Առաջին տիկին Մելանյա Թրամփը հաջորդ ամիս կնախագահի ՄԱԿ-ի Անվտանգության խորհրդի նիստը, երբ Միացյալ Նահանգները ստանձնի խորհրդի նախագահությունը՝ ընդգծելու կրթության դերը հանդուրժողականության և համաշխարհային խաղաղության խթանման գործում, հայտնում է CNN-ը:
«Տիկին Թրամփի առաջնորդությունը կնշանավորի առաջին դեպքը, երբ ԱՄՆ գործող առաջին տիկինը կնախագահի Անվտանգության խորհրդում, մինչ անդամները քննարկում են կրթության, տեխնոլոգիաների, խաղաղության և անվտանգության հարցերը»,- ասված է առաջին տիկնոջ գրասենյակի տարածած մամուլի հաղորդագրության մեջ։
Ակնկալվում է, որ ՄԱԿ-ում ԱՄՆ դեսպան Մայք Ուոլթսը, ՄԱԿ-ի Անվտանգության խորհրդի անդամները և միջազգային շահագրգիռ կողմերը նույնպես կմասնակցեն մարտի 2-ին Նյու Յորքում՝ ՄԱԿ-ի կենտրոնակայանում կայանալիք հանդիպմանը։ Նիստի թեման է՝ «Երեխաները, տեխնոլոգիաները և կրթությունը հակամարտություններում»։
Թրամփը հետաքրքրություն է ցուցաբերել Ռուսաստանի և Ուկրաինայի միջև պատերազմի ժամանակ ենթադրաբար առևանգված երեխաների ազատ արձակման հարցում։ Վերջերս նա հայտարարեց ուկրաինացի երեխաների և մեկ ռուս երեխայի՝ իրենց ընտանիքներ վերադառնալու մասին։
