«Հրապարակ» թերթը գրում է.
«ՔՊ-ում վերջին մեկ շաբաթվա ընթացքում երկրորդ շոկն ապրեցին երեկ՝ նախ Գյումրու և Փարաքարի ընտրությունների արդյունքներից, ապա՝ Մարտուն Գրիգորյանի հայտարարությունից, որ «առանց որևէ պաշտոնի, ակնկալիքի և որևէ պայմանավորվածության» քվեներ է տալիս Վարդան Ղուկասյանին։ ՔՊ-ն, որ լռելու հրահանգ ուներ ընտրություններից հետո, երեկ րոպեական մարտական պատրաստության բերվեց, և մեկը մյուսին հերթ չտալով` մի կենտրոնից բաժանված տեքստերով սկսեցին խոսել «քաղաքական առևտրականների», «ձայն գողացողների» մասին:
Ընտրված համայնքապետերին բերդ գցող, ընդդիմադիր ցուցակներից մարդ «գողացող» ՔՊ-ականները տվայտվում էին՝ ինչպես կարելի է ընտրողի ձայնը ստանալ ու տալ ուրիշին: Մինչդեռ, անգամ Երևանի ընտրություններից հետո, ՔՊ-ն և «Հանրապետություն» կուսակցությունը՝ Դոգի «բուքսիրով» քաղաքի կառավարումը ստանձնեցին, ավելի վատ որոշման գնալով և հանցավոր խմբավորմանն օգտագործելով: Գյումրու ընտրություններից հետո էլ է ՔՊ-ն պատրաստ եղել ցանկացած տիպի առևտրի, միայն թե Գյումրին չտա ընդդիմությանը։
Մեր լրագրողը նկատել է, որ քվեարկությունից հետո, ձայների հաշվարկի ժամանակ ՔՊ-ականները Սարիկ Մինասյանի շտաբում պատից կախված մեծ մոնիթորով հատուկ առանձնացրել ու հետևել են ոչ միայն ՔՊ-ի ձայներին, այլև՝ «Եվրադաշինքի», և երկու ուժերն էլ առանձնացրել կանաչ գույնով։ Հույս են փայփայել, որ գոնե արևմտամետների խմբակը մի 7 տոկոս կհավաքի, և կկարողանան ստանձնել Գյումրու կառավարումը»։
Մանրամասները թերթի այսօրվա համարում։
