Կանադան կազատվի «Ոսկե գմբեթ» հակահրթիռային պաշտպանության համակարգի համար վճարելուց, եթե որոշի միանալ ԱՄՆ-ին։ Այս մասին հայտնել է ԱՄՆ նախագահ Դոնալդ Թրամփը։
«Ես Կանադային, որը շատ է ցանկանում դառնալ մեր հիասքանչ «Ոսկե գմբեթ» համակարգի մի մասը, ասել եմ, որ դա նրա վրա 61 մլրդ դոլար կնստի, եթե նրանք մնան առանձին, բայց անհավասար ազգ։ Սակայն արժեքը զրո դոլար կկազմի, եթե նրանք դառնան բաղձալի 51-րդ նահանգը»,- գրել է Սպիտակ տան ղեկավարը Truth Social սոցցանցի իր էջում։ Նրա խոսքով՝ Կանադայում «դիտարկում են այդ առաջարկը»։
Մայիսի 20-ին Թրամփը հայտնել է, որ Միացյալ Նահանգները որոշում է կայացրել իր «Ոսկե գմբեթ» հակահրթիռային պաշտպանության համակարգի վերաբերյալ։ Նա նշել է, որ համակարգի ստեղծման համար կպահանջվի ընդամենը երեք տարի: Վաշինգտոնի վարչակազմն առաջարկում է դրա համար հատկացնել մոտ 175 մլրդ դոլար։
