Քաղաքական վերլուծաբան Վարդան Բալյանի ֆեյսբուքյան գրառումը․ «Թեհրանից ընտրված պատգամավոր Քամրան Ղազանֆարին Մեջլիսում հայտարարել է, թե Բաքվի վարչակազմը ձգտում է տապալել Իսլամական հանրապետությունը, իսկ նախագահ Մասուդ Փեզեշքիանը նրանց հետ բարեկամություն է փնտրում, այցելում Ադրբեջան և գրկում Իլհամ Ալիևին: Հատկանշական է, որ պատգամավորը բաց տեքստով իրանական խորհրդարանում մեղադրել է Ադրբեջանին Իսրայելի հետ Թավրիզի, Արդաբիլի, Ռեշթի և Թեհրանի ռմբակոծությունների համար:
Իրանում վերջին օրերին ներքաղաքական լուրջ զարգացումներ են: Մեջլիսի քննարկմանն է ներկայացվել օրինագիծ 30 պատգամավորների ստորագրությամբ, որտեղ գործող նախագահին մեղադրանք է ներկայացվում Ռահբար Խամենեիին իշխանազրկման, ըստ էության, պետական հեղաշրջման փորձի համար: Բարեփոխական ճամբարի առանցքային դերակատարներից ոմանք իրենց հերթին անհրաժեշտ են համարում ներկա քաղաքական համակարգի բարեփոխումը և առաջարկում են հանրաքվե անցկացնել այդ հարցով:
Վերջին մեկ ամսվա ընթացքում Իրանում անվտանգային միջոցառումների ուժեղացման ֆոնին հաղորդումներ են ստացվում մեծ թվով ձերբակալությունների և քաղաքացիական ազատությունների սահմանափակումների մասին: Ներքին ռեպրեսիաները վերաբերում են քաղաքական և քաղաքացիական ակտիվիստներին, կրոնական փոքրամասնությունների, անգամ օտարերկրյա քաղաքացիների: Բազմաթիվ են տեղեկությունները այն մասին, որ հարազատները շատ հաճախ որևէ կերպ չեն տեղեկացվում ձերբակալված անձանց կարգավիճակի մասին, դատաքննությունները հիմնական իրականացվում են արագացված ընթացակարգով և ուղեկցվում են դատավարական խախտումներով:
Այս իրադարձությունների հետ համաժամանակյա Բելգիայի խորհրդարանը, որը արցախահայության վերադարձի իրավունքի, Ադրբեջանի կողմից պատերազմական հանցագործությունների հետաքննության, հայկական մշակութային ժառանգության ոչնչացման ու յուրացման, Բաքվում պահվող հայ գերիների և նրանց նկատմամբ իրականացվող դատավարության մասին, Իսլամական հեղափոխության պահապանների կորպուսը ճանաչել է որպես ահաբեկչական կազմակերպություն և առաջարկել Եվրոմիությանը անել նույնը:
Կարելի է, իհարկե, շարունակել, բայց, կարծում եմ, այսքանն էլ բավական է արձանագրելու համար, որ Իրանի շուրջ և Իրանում իրավիճակի զարգացումները 12-օրյա պատերազմից հետո մտահոգիչ են և անմիջական հետևանքներ են ունենալու նաև մեր ազգային անվտանգության համար»։
