Վարդան Բալյանը ֆեյսբուքյան իր էջում գրում է․
Իրանում և Իրանի շուրջ իրավիճակը շարունակում է զարգանալ թերևս վատագույն սցենարով: Ջրային ճգնաժամի, էներգամատակարարումների տևական ու անընդհատ անջատումների, պարենային ապրանքների գների էական թանկացումների, տնտեսական իրավիճակի և բիզնեսի միջավայրի բացասական զարգացումների մասին առիթ ունեցել եմ գրել: Ծանր իրավիճակ է ստեղծվել գյուղատնտեսության ոլորտում, մասնավորապես, անասնապահության և բուսաբուծության:
Բազմաթիվ են հաղորդումները դեղորայքի թանկացման, իսկ որոշ մեծ պահանջարկ ունեցող դեղամիջոցների դեֆիցիտի մասին: Միջուկային բանակցությունների ընթացքը առնվազն մինչև հիմա լավատեսական սպասումների առիթ չի տալիս, շատ հավանական է սանկցիոն ռեժիմի խստացումը և նոր պատժամիջոցների սահմանումը: Իրանական խորհրդարան հրատապ կարգով մուտք է արվել օրինագիծ, որով նախատեսվում է պատժամիջոցների մեխանիզմի գործարկման պարագայում 24 ժամյա ռեժիմով ընդունել Միջուկային զենքի չտարածման մասին պայմանագրից դուրս գալու որոշում:
Փորձագիտական հանրույթը, պետական պաշտոնյաները, քաղաքական գործիչները հանրային տեղեկատվական հարթակներում լրջորեն քննարկում են նոր պատերազմի հավանականությունը: Ըստ որում, վերջին օրերին, հատկապես, Թուրքիայում ԱՄՆ դեսպանի հայտարարությունից հետո այսպես կոչված Զանգեզուրի միջանցքի թեման դարձել իրանական լրատվամիջոցների ուշադրության առանձնահատուկ նյութ: Բազմաթիվ հոդվածներ, լրատվական-վերլուծական տեսանյութեր, որոնց տևողությունը հաճախ գերազանցում է 5-10 րոպեն, և անընդհատ կարմիր գծի հավաստանշում՝ ՆԱՏՕ-ի Թուրանական միջանցքի բացումն Իրանի սահմանին անթույլատրելի է:
Կարդում եմ, նայում ու ակամա զարմանում, որովհետև Հայաստանում այդ խնդրով մտահոգությունը թվում է շատ ավելի քիչ, եթե, իհարկե, նման մտահոգություն իսկապես կա: Գուցե արժե մի քիչ անհանգստանալ, քանի որ գոնե այս պահին հստակ է, որ Իրանը հակված է իր համար անցանկալի զարգացումների պարագայում ռազմական միջամտության դիմել:
