Իրանի քաղաքացիները պետք է ցուցաբերեն հաստատակամություն, հեռատեսություն և պահպանեն ազգային միասնությունը՝ խափանելու արտաքին թշնամիների դավադրությունները, որոնք նպատակ ունեն պառակտում մտցնել հասարակության մեջ։ Այս մասին հայտարարել է Իրանի Իսլամական Հանրապետության գերագույն առաջնորդ այաթոլլա Մոջթաբա Խամենեին՝ ուղերձում, որը ընթերցել է Մոհամմադ Ջավադ Հաջ Ալի Աքբարին։ Հաղորդում է ԻՌՆԱ-ն։
«Բոլոր քաղաքացիները պետք է դիմակայեն թշնամուն՝ պահպանելով զգոնությունը, միասնությունը, համախմբվածությունն ու փոխադարձ վստահությունը, չաջակցելով հակառակորդների ծրագրերին, որպեսզի ամբողջությամբ ձախողեն նրանց չարամիտ մտադրությունները», — ընդգծվում է գերագույն առաջնորդի ուղերձում։
Իդ ալ-Ղադիր տոնին նվիրված հատվածում Իրանի ղեկավարը հիշեցրել է, որ առաջին շիա իմամ Իմամ Ալի-ն Աստծուն ծառայելու բարձրագույն օրինակն է և համապարփակ ուղենիշ բոլոր մահմեդականների համար՝ երիտասարդներից մինչև քաղաքական առաջնորդներ ու էլիտաներ։ Նրա խոսքով՝ հենց այդ օրինակին հետևելն էր կազմում իսլամական հեղափոխության երկու նախորդ առաջնորդների գործունեության հիմքը։
Այաթոլլա Մոջթաբա Խամենեին նաև նշել է, որ իմամ Խոմեյնիի գաղափարախոսության հիմքում ընկած էր «Աստծո անունով ապստամբությունը», որը խորապես փոխակերպող ազդեցություն է ունեցել հասարակության վրա։ Երկրի ղեկավարը մեջբերել է Խոմեյնիի քաղաքական կտակից մի հատված, որտեղ վերջինս վստահություն էր հայտնում, որ ժամանակակից իրանցի ժողովուրդն իր տոկունությամբ և իդեալներին նվիրվածությամբ գերազանցում է վաղ իսլամական ժամանակաշրջանների հասարակություններին։
Այսօր, հավելել է գերագույն առաջնորդը, Իրանը տարածաշրջանային «դիմադրության առանցքի» հետ միասին կրկին ապացուցում է այդ խոսքերի ճշմարտացիությունը համաշխարհային հանրության առաջ։
