Իրանի Իսլամական Հանրապետության արտաքին գործերի նախարար Աբբաս Արաղչին հեռախոսազրույց է ունեցել Իրաքի իր գործընկերոջ՝ Ֆուադ Հուսեյնի հետ։ Այս մասին հայտում է իրանական IRNA գործակալությունը՝ մանրամասնելով, որ հեռախոսազրույցի ընթացքում Իրաքի ԱԳ նախարարը դատապարտել է Իրանի վրա Իսրայելի հարձակումը։
Իրանական գործակալության փոխանցմամբ՝ հեռախոսազրույցի ընթացքում Հուսեյնը խորին ցավակցություն է հայտնել Իրանի զինված ուժերի բարձրաստիճան հրամանատարների, միջուկային գիտնականների, համալսարանական դասախոսների և քաղաքացիական անձանց նահատակության կապակցությամբ՝ կոչ անելով համաշխարհային հանրությանը դատապարտել Իսրայելի կողմից կատարված այս հանցագործությունը։
Ֆուադ Հուսեյնը Իսրայելի հարձակումը անվանել է Իրանի ազգային ինքնիշխանության, միջազգային իրավունքի և ՄԱԿ-ի կանոնադրության կոպիտ խախտում։
«Իրանի դեմ Իսրայելի ագրեսիան լուրջ սպառնալիք է, որը կարող է վտանգել ամբողջ տարածաշրջանի կայունությունն ու անվտանգությունը»,-ընդգծել է Հուսեյնը։
Իր հերթին Իրաքյան «Ան-Նուջաբա» շարժումը կառավարությանը կոչ է արել վտարել ամերիկյան զորքերը՝ նրանց մեղադրելով այն բանում, որ նրանք թույլ են տվել Իսրայելին մասշտաբային օդային գրոհներ իրականացնել Իրանի տարածքի խորքում։
«Իսրայելական հարձակումն իսլամական հանրապետության դեմ, Իրաքի օդային տարածքի շարունակվող խախտումների կողքին, ԱՄՆ ուժերի հետ համակարգմամբ, չպետք է անպատասխան մնա։ Անհրաժեշտ է ԱՄՆ զորքերի լիակատար դուրսբերում Իրաքի տարածքից եւ երկնքից»,- նշել է շարժման գլխավոր քարտուղար Աքրամ ալ-Քաաբին։
