Քաղաքագետ Գարիկ Քեռյանը ֆեյսբուքյան իր էջում գրել է․
«Միացյալ Նահանգները ծանուցել է եվրոպացի դաշնակիցներին, որ Ռուսաստանը «անհամաչափ պատասխան» է պատրաստում ավիաբազաների վրա հարձակմանը: Եվ ցավալին այն է, որ հավանաբար դա տեղի կունենա Ստամբուլի բանակցություններին զուգահեռ: Հետաքրքիր է նաև այն, որ Սպիտակ Տունը պաշտոնապես հայտարարեց, որ տեղեկացված չեն եղել այդ ռազմական գործողության մասին: Պարզ է նաև, որ այս յուրահատուկ ռազմական գործողությունը, երբ բեռնատարներով դրոնները տեղափոխում են թիկունք և տիեզերական կապով գործողության մեջ դնում , իրականացվել է երկու-երեք եվրոպական երկրների հատուկ-հետախուզական ծառայությունների կողմից, բրիտանականի ղեկավարությամբ: Հավանաբար ռազմական փորձագետները մոտ ժամանակներում կտան դրա գնահատականը: Ինչ՞ հետևություններ կարելի է անել: Այն, որ ամերիկյան կողմը տեղյակ չի եղել՝ կասԿած չի հարուցում: Փաստորեն կրկին անգամ համոզվում ենք, որ Հավաքական Արևմուտք բևեռն արդեն երկատված է: Վաշինգտոնը ձգտում է հասնել խաղաղության, Բրյուսելը Լոնդոնի հետ խրախուսում է Ուկրաինային պատերազմը շարունակելու հարցում: Փաստորեն ստացվում է ռուսական «անհամաչափ պատասխանի», որն Աստված չանի վերածվի միջուկային հարվածի, շահառուներ կան: Թուրքիայի առաջնորդ Էրդողանը իսկապես նպաստում և օժանդակում է զինադադարին, իսկ «ժողովրդավարների» կաբինետներում ծնվում և իրականացվում են ռազմական չտեսնված գործողություններ, սառն ու անտարբեր դիտելով արյունահեղ տեսարանները: Վերջերս պատահաբար դիտեցի մի տեսանյութ որտեղ ՄԱԿ-ի անվտանգության խորհրդի նիստում Պաղեստինի ներկայացուցիչը իր ելույթի ժամանակ սկսեց արտասվել, երբ ներկաներին ներկայացնում էր արաբ երեխաների զանգվածային սպանդը: Ներկաներից ոչ մեկի դեմքի արտահայտությունը չփոխվեց, նայում էին սառն ու անտարբեր հայացքով: Նույն հայացքն ունեին եզդիների ցեղասպանության օրերին և նաև ուկրաինական արյունահեղության այս օրերին: Հիշեցի նաև մեր արևմտասերների եռանդը, երբ արցախյան գողգոթայի ժամանակ ՄԱԿ-ին դիմելու կոչեր էին անում: Ինչ՞ նոր աղետներ կբերի Մոսկվայի անհամաչափ պատասխանը: Սա է այսօրվա թիվ մեկ հարցը»:
