Հայրենի հողը պետք է սիրել ոչ միայն խոսքով, այլև քրտինքով ու, եթե հարկ լինի, արյամբ. Ռուբեն սրբազան

21 Սեպտեմբերի, 2026

Մասյացոտնի թեմի առաջնորդ Գերաշնորհ Տեր Ռուբեն եպիսկոպոս Զարգարյանն այցելել է Այգեզարդի կառուցվող Սուրբ Վարդան եկեղեցական համալիր, որտեղ հանդիպել է համայնքի պատանիների և «Կորիզ» մանկապատանեկան համույթի անդամների հետ։

Դիմելով պատանիներին՝ Սրբազան Հայրը շեշտել է, որ կրթությունը միայն գիտելիք ձեռք բերելու կամ մասնագիտություն սովորելու գործընթաց չէ. «Կրթությունը մարդկայնացման ճանապարհ է՝ մարդու ֆիզիկական, մտավոր և հոգևոր ձևավորման ուղի։ Կրթությունը առաքինի մարդ, օրինապահ քաղաքացի, քրիստոնյա և հավատարիմ ընկեր ձևավորելու արվեստ է»։

Սրբազան Հայրը պատանիներին խրախուսել է ճանաչել իրենց մեջ եղած աստվածատուր շնորհները, զարգացնել դրանք կրթության ու աշխատանքի միջոցով և հետագայում սեփական կարողությունները վերածել արժեքի՝ ծառայեցնելով մարդուն, համայնքին և հայրենիքին։

Այս միտքը բացատրելու համար Սրբազան Հայրը բերել է երկրաբանության օրինակը. «Բնության մեջ պատրաստի ոսկյա կամ ադամանդյա զարդ չես գտնի։ Նախ պետք է հայտնաբերել հանքաքարը, արդյունահանել այն, ապա երկարատև մշակման ու աշխատանքի միջոցով ստանալ այն արժեքը, որը կարող է դառնալ զարդ։ Նույնը վերաբերում է նաև մարդուն։ Մեր մեջ կան Աստծո կողմից տրված շնորհներ, սակայն դրանք պետք է հայտնաբերել, ճանաչել և կրթության միջոցով զարգացնել։ Ծնողը, ուսուցիչը և դաստիարակը օգնում են երեխային բացահայտել իր մեջ եղած այդ «հանքաքարը», իսկ կրթությունն ու աշխատանքն այն վերածում են արժեքի»։

Սրբազան Հայրն անդրադարձել է նաև համայնքի զորացմանն ու միասնականությանը՝ ընդգծելով, որ ուժեղ պետության հիմքում ուժեղ, համերաշխ և միմյանց զորակցող համայնքներն են։

«Ուժեղ պետություն ունենալու համար պետք է ուժեղ համայնքներ ունենանք։ Իսկ համայնքը զորանում է, երբ մարդիկ միմյանց կողքին են, ճանաչում են միմյանց, միասին են ապրում, աշխատում և պատասխանատվություն կրում միմյանց համար։ Եկեղեցին հենց այդպիսի համայնք է․ մենք այստեղ միասին աղոթում ենք, միասին սնվում ենք Քրիստոսի Մարմնով, միասին երգում ենք, միասին ուրախանում, խաղում ու ապրում ենք»։

Անդրադառնալով Հայաստանի Հանրապետության Անկախության տոնին՝ Ռուբեն Սրբազանը պատանիների հետ խոսել է հայրենի հողի, հավատքի և Աստծո նկատմամբ հավատարմության խորը կապի մասին՝ պարզ ու մատչելի կերպով անդրադառնալով Ավետյաց Երկրի աստվածաշնչյան օրինակին։

«Հայրենիքը միայն հողակտոր չէ, որի վրա մենք ապրում ենք։ Այն ժառանգություն է, պարգև՝ Աստծո կողմից, և ավանդ՝ մեր հայրերից։ Հողի հետ մեր հարաբերությունը հավատարմության հարաբերություն է։ Աստվածաշնչում Ավետյաց Երկիրը ոչ միայն տրված պարգև է, այլև պատասխանատվություն։ Աստծուն հավատարմությունը պետք է արտահայտվի մեր կյանքի մեջ՝ հասարակության ներսում արդարությամբ, միմյանց նկատմամբ ազնվությամբ, իսկ հայրենի հողի նկատմամբ՝ հոգատարությամբ, այն մշակելով, պահպանելով ու շենացնելով»։

Սրբազան Հայրը շեշտել է, որ հայրենիքը պահվում է ոչ միայն խոսքերով, այլև ամենօրյա աշխատանքով, նվիրումով և անհրաժեշտության դեպքում՝ զոհողությամբ։

«Հայրենի հողը պետք է սիրել ոչ միայն խոսքով, այլև քրտինքով ու, եթե հարկ լինի, արյամբ։ Հողը մեզ է վստահված, և մենք պարտավոր ենք այն մշակել, պահպանել ու հաջորդ սերնդին փոխանցել ավելի ամուր և բարեկարգ վիճակում՝ հեռանկարը ունենալով դրախտի պատկերը»։

Հանդիպման ավարտին Սրբազան Հայրը շնորհավորել է պատանիներին և «Կորիզ» մանկապատանեկան համույթի ղեկավար Արփինե Խաչատրյանին Անկախության տոնի առիթով՝ մաղթելով, որ նրանց կրթությունը, տաղանդները, հավատքը և աշխատանքը վերածվեն այն արժեքների, որոնցով կզորանան իրենց ընտանիքները, համայնքը, Եկեղեցին և հայրենի պետությունը։

Այգեզարդի Սուրբ Վարդան եկեղեցական համալիրը, ձևավորվող համայնքային կյանքի հետ միասին, կոչված է դառնալու ոչ միայն քրիստոնեական հավատի ու աղոթքի, այլև կրթության, մշակույթի, եղբայրության և սերունդների հանդիպման վայր։

Նմանատիպ նյութեր

Արմավիրի մարզից 3 հոգի սուր կտրnղ-ծակnղ առարկայից ստացած հարվածներից տեղափոխվել են հիվանդանոց

Արմավիրի մարզից 3 հոգի սուր կտրnղ-ծակnղ առարկայից ստացած հարվածներից տեղափոխվել են հիվանդանոց

Երեկ՝ նոյեմբերի 16-ին, արտակարգ դեպք է տեղի ունեցել Արմավիրի մարզում։ Ժամը 07։20-ի սահմաններում ՀՀ ներքին գործերի նախարարության ոստիկանության քրեական ոստիկանության գլխավոր վարչության Արմավիրի մարզային վարչությունում օպերատիվ տեղեկություններ են ստացվել, որ «Վաղարշապատ»...

Իրանը հայտարարել է Հայաստանում նավթավերամշակման գործարանի կառուցմանը մասնակցելու պատրաստակամության մասին

Իրանը հայտարարել է Հայաստանում նավթավերամշակման գործարանի կառուցմանը մասնակցելու պատրաստակամության մասին

  Իրանի նավթի նախարարի պաշտոնակատար Համիդ Բովարդը հայտարարել է, որ Թեհրանը պատրաստ է մասնակցել Հայաստանում էներգետիկ խոշոր ծրագրերի իրականացմանը։ Մասնավորապես, Իրանը պատրաստ է օգտագործել իր տեխնիկական և ինժեներական հնարավորությունները Հայաստանում նավթավերամշակման...

Քոչարյանին կալանավորելուց հետո սկսվեց ազգային արժեքների կազմաքանդումը․ Անուշ Առաքելյան

Քոչարյանին կալանավորելուց հետո սկսվեց ազգային արժեքների կազմաքանդումը․ Անուշ Առաքելյան

«Հայաստան» դաշինքի անդամ Անուշ Առաքելյանը ֆեյսբուքյան իր էջում գրում է․ Երեկ մասնակցում էի Հայաստան խմբակցության կողմից կազմակերպված ԱԺ լսումներին։ Լուռ հետևում էի ելույթները։ Խոսվեց քաղբանտարկյալների, հետապնդումների ու հալածանքների մասին։ Այո, 2018 թվականից...

Ռուբինյանի խոսքը բացահայտում է նրա վերաբերմունքը սեփական արժանապատվության հանդեպ. Տեր Մանուկ քահանա

Ռուբինյանի խոսքը բացահայտում է նրա վերաբերմունքը սեփական արժանապատվության հանդեպ. Տեր Մանուկ քահանա

Տեր Մանուկ քահանա Զեյնալյանը գրել է․ «Անդրադառնալով Ազգային Ժողովի նախագահի փողոցային խոսույթին… Ռուբինյա՛ն, քաղաքական բանավեճը փողոցային արտահայտություններով մի՛ փոխարինեք։ Ձեր պաշտոնը Ձեզ պարտավորեցնում է բարձրացնել խոսքի մակարդակը, ոչ թե իջեցնել այն։ Ամենայն Հայոց...

Նոյեմբերյանի և Բերդի ճանապարհներին մառախուղ է

Նոյեմբերյանի և Բերդի ճանապարհներին մառախուղ է

Նոյեմբերի 16-ին՝ ժամը 20։10-ի դրությամբ, Նոյեմբերյանի և Բերդի տարածաշրջանների ավտոճանապարհներին մառախուղ է, տեսանելիությունը՝ 50-80 մետր։ Հայտնում են Ճանապարհային դեպարտամենտից։ Միջպետական և հանրապետական նշանակության բոլոր ավտոճանապարհները բաց...