«Հայ դատի գրասենյակների և հանձնախմբերի հերթական խորհրդաժողովը տեղի է ունենում այն պայմաններում, երբ Ադրբեջանի ու Թուրքիայի իշխանություններին զուգահեռ Հայաստանի իշխանությունները բացահայտ և անթաքույց հարձակում են սկսել Հայ դատի համակարգի և աշխարհասփյուռ Հայ դատի ցանցի նկատմամբ:
Վերջին շրջանում իշխանական քարոզչամեքենան բացահայտ արշավ է սկսել Հայ դատի գրասենյակների դեմ՝ փորձելով հանրությանը հրամցնել թեզեր, թե իբր Հայ դատի նպատակներն ու պետական շահը միմյանց հակասում են, թե իբր Հայ դատը չի ներկայացնում հայ ժողովրդի բովանդակ շահերը, այլ պաշտպանում է նեղ կուսակցական շահեր, թե իբր Հայ դատի պայքարը խանգարում է պետականությանը, և Սփյուռքի մեր կառույցներն ու Հայ հեղափոխական դաշնակցությունը վտանգում են մեր պետականությունը:
Այս առիթից օգտվելով՝ ևս մեկ անգամ շատ հստակ ուզում եմ արձանագրել, որ Հայ դատի գործունեությունը և Հայաստանի Հանրապետության շահերը չեն կարող միմյանց հակասել. դրանք նույնական են: Հայ դատը պայքարում է հենց Հայաստանի ու հայ ժողովրդի շահերի համար: Հայ դատը չէ, որ վտանգ է մեր պետությանը:
Պետականությանը վտանգում է Ադրբեջանի ու Թուրքիայի բոլոր պահանջները բավարարող Հայաստանի իշխանությունների վարած արտաքին և ներքին քաղաքականությունը, պետականությանը վտանգում է սեփական ժողովրդի իրավունքներից, Հայոց ցեղասպանության միջազգային ճանաչումից և ազգային արժանապատվությունից հրաժարվելը»,- այս մասին ՀՅԴ Հայ դատի գրասենյակների և հանձնախմբերի խորհրդաժողովի իր ելույթում ասաց ՀՅԴ գերագույն մարմնի ներկայացուցիչ, «Հայաստան» խմբակցության պատգամավոր Իշխան Սաղաթելյանը։
Մանրամասն՝ տեսանյութում։
