ԱՄՆ նախագահ Դոնալդ Թրամփը հայտարարել է, որ Ռուսաստանի նախագահ Վլադիմիր Պուտինի հետ հանդիպման ժամանակ հաջողվել է համաձայնության գալ տարածքային փոխանակումների և Ուկրաինայի անվտանգության երաշխիքների տրամադրման հարցի շուրջ։ Այս մասին նա ասել է Fox News-ին տված հարցազրույցում՝ Ալյասկայում Պուտինի հետ գագաթնաժողովից հետո։
«Սրանք այն կետերն են, որոնք մենք քննարկել ենք և այն կետերն են, որոնց շուրջ մենք հիմնականում համաձայնության ենք եկել։ Իրականում, կարծում եմ, որ մենք համաձայնության ենք եկել շատ հարցերի շուրջ»,- նշել է Թրամփը։
Միևնույն ժամանակ ԱՄՆ նախագահը վստահություն է հայտնել, որ Վլադիմիր Զելենսկին պետք է համաձայնության գա Ռուսաստանի հետ՝ ուկրաինական հակամարտությանը վերջ դնելու համար։
«Ուզում եմ տեսնել, թե կարո՞ղ ենք դա անել։ Համաձայնագիրը դեռ պատրաստ չէ։ Եվ Ուկրաինան պետք է համաձայնի… Զելենսկին պետք է գարծարքի գնա։ Կիևի ռեժիմի ղեկավարը շատ բան ունի կորցնելու Ռուսաստանի հետ հակամարտության մեջ։ Ուկրաինայում կարգավորման շուրջ համաձայնության հասնելու հնարավորությունն այժմ կախված է Զելենսկուց և եվրոպական երկրներից»,- ասել է նա։
Ուկրաինական հակամարտության շուրջ դեռևս համաձայնության չեն հասել, սակայն Թրամփի խոսքով՝ «մեկ կամ երկու կարևոր կետ» կա քննարկելու։
«Գործարքը դեռ պատրաստ չէ, բայց կողմերը շատ մոտ են դրան»,- նշել է նա։
FoxNews-ը նաև հայտնել է, որ Պուտինի հետ բանակցություններն ավարտելուց հետո ԱՄՆ նախագահը զանգահարել է Ուկրաինայի նախագահ Վլադիմիր Զելենսկուն և եվրոպացի առաջնորդներին, սակայն այլ մանրամասներ չեն հաղորդվում։
