«Այս դահլիճի լեփ լեցուն լինելը խոսում է այն մասին, որ մենք, մեր ընտանիքները, մեր ընկերները, մեր շրջապատը համաձայն չեն այն ամենի հետ, ինչ կատարվեց այս անցնող ութ տարիներին Հայաստանի և Արցախի հետ։ 

Իսկ ինչ կատարվեց՝ բոլորս ականատես եղանք․ պարբերաբար տարբեր ոտնձգություններ Հայ Առաքելական եկեղեցու դեմ: Բարձրաստիճան հոգևորականներ կալանավորվեցին, հասավ այն աստիճանի, երբ երկրի վարչապետը եվրոպական տարբեր ամբիոններից, կարծես մի բամբասկոտ, լաչառ կին, բամբասում էր մեր Առաքելական Եկեղեցու բարձրաստիճան հոգևորականների մասին և կարծես թե արտաքին ինչ-որ ուժերից այսպես ասած օգնություն խնդրում»,- Աշտարակ քաղաքում հանդիպման ժամանակ ասաց «Հայաստան» դաշինքի անդամ, «Առաջ» կուսակցության նախագահ Սևակ Խաչատրյանը:

«Լկտիության մակարդակը հասել է այնտեղ, որ մեր՝ առաջին քրիստոնեական երկրի հոգևոր առաջնորդին, Ամենայն Հայոց կաթողիկոսին, որևէ քննիչ իրեն իրավունք վերապահեց չթույլատրել, որ մասնակիցը լինի վրաց կաթողիկոսի հուղարկավորությանը։ Իսկ ի՞նչ կա սրանից գաղջ ու խայտառակ»,- ասաց նա։

«Այս անցնող տարիներին տարբեր պայքարների միջոցով մենք անցել ենք, թե՛ փողոցային պայքարներով, թե՛ խորհրդարանում «Հայաստան» դաշինքի պատգամավորները փորձել են պայքար մղել այսօրվա իշխանությունների և իրենց վարած քաղաքականության դեմ: Յուրաքանչյուրս պարտավոր ենք մեր խրամատում, մեր մերձավորների բակերում, գյուղերում, մեր ընկերական շրջապատներում այս հարցերը վեր հանել, միասնական թիմեր ստեղծել և էլ ավելի նոր ուժով պայքարել այն ամենի դեմ, ինչը որ այսօր կատարվում է Հայաստանի Հանրապետությունում: 

Ինչ կատարվեց Արցախի հետ՝ բոլորս տեսանք։ Պետք է մենք մեր ընկերներին բացատրենք, որ իրենք ընտրելով «Հայաստան» դաշինքը, ընտրում են Հայաստանը․ այն Հայաստանը, որտեղ ազգային արժեքներն ավելի կարևոր են, քան ասֆալտն ու բորդյուրը։ Տարիներ շարունակ ասֆալտն ազգային և հոգևոր արժեք սարքելով, այսօրվա իշխանությունները խաբելով մարդկանցից քվե են կորզել։

Այլևս այդպես չի լինելու, որովհետև մենք բոլորս մեր ուժերը մեկտեղելու ենք և պայքարելու ենք այդ ամենի դեմ: 

Ընտրելու ենք այն Հայաստանը, որտեղ Արցախի մասին պատմող գիրք նվիրելու համար ոչ մեկին աշխատանքից չեն ազատելու։ Այլևս նման բաներ չեն լինելու, մեր ինքնության մասին խոսելու համար ոչ մեկ չի պատժվելու․ իսկ մենք այսօր դա տեսնում ենք: 

Ես վստահ եմ, որ բոլորով մեր ուժերը մեկտեղելով կարողանալու ենք այդ արդյունքին հասնել։ Մեր գործն արդար է, ի գործ, բոլորիս ցանկանում եմ հաղթանակ»,- ասաց Սևակ Խաչատրյանը։

Ելույթն ամբողջությամբ՝ տեսանյութում։